ქუთაისიპოსტი

ჭიათურაში უკვე 183 დღეა, პროტესტი გრძელდება.

როგორც მაღაროელები ამბობენ, ეს არა მხოლოდ პროტესტი, სოლიდარობის გამოხატულებაა, რადგან აქ დგანან და იდგებიან მანამ, სანამ მათი დაკავებული თანამებრძოლების ბედი საბოლოოდ არ გაირკვევა.

მშრომელების მთავარი მოთხოვნა ახლა ერთია: 4 მაღაროელის დაუყონებლივ გათავისუფლება.

"აქ მყოფებმა თითქმის დავივიწყეთ საკუთარი ოჯახები, პირადი პრობლემები და უამრავი სირთულე, რომლებიც ყოველდღიურად გვხდება. მიუხედავად იმისა, რომ ჩვენს წინააღმდეგ ჭორებს და ცრუ ინფორმაციას ავრცელებენ, ჩვენ მაინც შეუპოვრად ვაგრძელებთ სოლიდარობას ჩვენი მეგობრებისადმი.

ვისაც ჩვენზე სხვა წარმოდგენები გაქვთ, გთხოვთ, ერთი წუთით წარმოიდგინეთ თავი ჩვენს ადგილას: თქვენ მიატოვებდით თქვენს მეგობრებს? იმ ადამიანებს, რომელთა დიდი წვლილია, რომ დღეს ჭიათურაში შრომობთ და ცხოვრობთ? ჩვენ ვერ მივატოვეთ. პირად და ოჯახურ კეთილდღეობაზე უარი ვთქვით, რადგან მეგობრობა და სამართლიანობა უფრო მნიშვნელოვანია.

აქ ყოფნა არც მარტივია, არც კომფორტული — კარავში ცხოვრება მძიმეა, თან ამავდროულად ვზრუნავთ ციხეში მყოფ მეგობრებზეც. ეს ბრძოლა სავსეა გამოწვევებით, მაგრამ ჩვენ არავის არაფერს ვამადლით და თავს არავის ვაცოდებთ. უბრალოდ, ახლა განსაკუთრებით გვჭირდება საზოგადოების დახმარება.

დღეს გაკეთებული სიკეთე განსაკუთრებით მადლიანი იქნება თითოეულისთვის. გიზიარებთ ანგარიშის ნომერს. თქვენი შესაძლებლობის ფარგლებში, გთხოვთ, შემოგვიერთდით და შეიტანეთ წვლილი ჩვენსა და იმ ბიჭების თანადგომაში. #GE40BG0000000604733786",- ამბობენ მაღაროელები.

ჭიათურელი მაღაროელები ექვს თვეზე მეტია, აპროტესტებენ კომპანიის მიერ მათი შრომითი უფლებების მძიმე დარღვევებს, მათ შორის, ხელფასების გადაუხდელობას, უკანონო რეორგანიზაციასა და თანამშრომლების მასობრივ გათავისუფლებას.

მაღაროელების მოთხოვნებს ახლა უკვე დაემატა დაკავებულის გათავისუფლება, რომელთა საქმის არსებითი განხილვაც სასამართლოში 1 აგვისტოს დაიწყო.