ქუთაისიპოსტი

ქუთაისში, კოსტავას ქუჩაზე, სარეაბილიტაციო სამუშაოების დასრულების თარიღი კიდევ 3 თვით გადავადდა.
სატენდერო დოკუმენტაციის მიხედვით, გზის საფარის რეაბილიტაცია, რომელიც ჯერ თებერვლის თვეში, შემდეგ კი ივნისში უნდა დასრულებულიყო, ახლა 1 სექტემბერს უნდა დამთავრდეს.

სახელმწიფო შესყიდვის დოკუმენტში, სამუშაოების შესრულების ვადის გაგრძელების ერთ-ერთ მიზეზად მითითებულია, რომ ობიექტზე სამუშაოების მეორე ეტაპს გაერთიანებული წყალმომარაგების კომპანია აწარმოებდა, ამჟამად კი სამუშაოები ენერგო-პრო-ჯორჯიას მიერ მიმდინარეობს, რომელიც დასრულებას 12 ივლისისთვის გეგმავს.

„ენერგო-პრო ჯორჯიას“ არ აქვს დასრულებული სამუშოები კოსტავას ქუჩაზე 360 პიკეტიდან 750 პიკეტამდე, რაც ხელს უშლის ტროტუარების ნაწილში დენის კაბელების და ფილების
დაგებით სამუშაოებს. აღნიშნული აძნელებს სამუშაოთა შესრულებას და პროექტის დასრულების ვადებს.

რაც შეეხება ლამპიონების პარამეტრებს, არაერთხელ გთხოვეთ, მოგეყვანათ ხარჯთაღრიცხვასთან შესაბამისობაში, თუმცა თქვენი მხრიდან ვერ მივიღეთ ჯეროვანი პასუხი, რატომ უნდა გავითვალისწინოთ პროექტზე წარმოდგენილი ნახაზი და არა ხარჯთაღრიცხვა, რომელიც იურიდიულად თანაბარი ძალის მნიშვნელობის დოკუმენტია.

ყოველივე ზემოთ აღიშნულიდან გამომდინარე, გთხოვთ გაითვალისწინოთ, რომ მოგვიწია შეფერხება ჩვენგან დამოუკიდებელი მიზეზების გამო. კერძოდ: დაგვემატა მესამე ჩიხის ახალი სანიაღვრე სისტემის მოწყობა, ასევე დამატებით მოგვიწია ასფალტისა და გრუნტის სამუშაოების შესრულება. ამიტომ გთხოვთ, გაგვიგრძელოთ პროექტის შესრულების ვადა 2025 წლის აგვისტოს ბოლომდე, ამავე დროს გთხოვთ, დააკორექტიროთ ხარჯთაღრიცხვა",- ვკითხულობთ კომპანია "ჯეო კონსტრაქშენ ენდ სისტემს ინკ საქართველოს ფილიალის" დირეტორის მიერ ქუთაისის მერიის საბინაო ინფრასტრუქტურის განვითარების სამსახურისთვის მიწერილ წერილში.

კოსტავას ქუჩაზე სარეაბილიტაციო სამუშაოები ერთი წელია მიმდინარეობს. კომპანია "ჯეო კონსტრაქშენ ენდ სისტემს ინკ საქართველოს ფილიალი" სამუშაოებს 2 198 772 ლარის სანაცვლოდ ახორციელებს. მერიას კომპანიისთვის თანხის 75% - 1 653 038 ლარი გადახდილი აქვს.

კოსტავას ქუჩის გზის საფარის რეაბილიტაცია 2024 წლის ივნისში დაიწყო. მართალია, სამუშაოები 9 თვეში, ანუ მიმდინარე წლის თებერვალში უნდა დასრულებულიყო, თუმცა, ხელშეკრულებაში მალევე შევიდა ცვლილებები და სამუშაოების დასრულების თარიღი სამჯერ გადავადდა.

სატენდერო დოკუმენტაციის მიხედვით, რეაბილიტაცია უნდა ჩაუტარდეს შიდა გზას, რომლის სიგრძეც 746 მეტრია. ასევე, გათვალისწინებულია კოსტავას ქუჩის მიმდებარე ჩიხების რეაბილიტაციაც. გზის ორივე მხარეს მოეწყობა ტროტუარები, ბორდიურები და სანიაღვრე არხი.


ამავე თემაზე:

გაჭიანურებული რეაბილიტაცია - რატომ გადავადდა კოსტავას ქუჩაზე სამუშაოები

"სანამ სახელფასო დავალიანებას არ გაგვისწორებენ, გაფიცულები ვიქნებით"- რა ხდება კოსტავას ქუჩაზე

3 ივნისიდან - 31 აგვისტომდე, კოსტავას ქუჩაზე მოძრაობა შეიზღუდება

მერია კოსტავას ქუჩის რეაბილიტაციისთვის ტენდერს მეორედ აცხადებს

ქუთაისის მერიამ კოსტავას ქუჩის რეკონსტრუქციის ტენდერი შეწყვიტა

ქუთაისში, კოსტავას ქუჩის რეკონსტრუქციაზე 2 მილიონ ლარამდე დაიხარჯება