ქუთაისიპოსტი

მთავრობამ, იმერეთისა და გურიის რეგიონებში, დიდთოვლობის შედეგად დაზარალებული ფერმერული მეურნეობების დახმარების მიზნით გასატარებელი ღონისძიებები დაამტკიცა.
კერძოდ, 19 ივნისის განკარგულებით, დამტკიცდა 2025 წლის თებერვლის თვეში „გურიისა და იმერეთის რეგიონებში დიდთოვლობის შედეგად დაზარალებული ფერმერული მეურნეობების დახმარების პროგრამა“.

პროგრამის მიზანი დაზარალებულ რეგიონებში ა(ა)იპ სოფლის განვითარების სააგენტოს პროექტების/პროგრამების ფარგლებში შექმნილი ფერმერული მეურნეობ(ებ)ის აღდგენაა, პროგრამის ამოცანა კი დაზიანებული ფერმერული მეურნეობ(ებ)ის აღსადგენად ფინანსური დახმარების გაწევაა.

პროგრამას ა(ა)იპ - სოფლის განვითარების სააგენტო ახორციელებს და მისი პროტენციური ბენეფიციარები არიან პირები, რომლებსაც იმერეთის და გურიის რეგიონებში „მერძევეობის დარგის მოდერნიზაციისა და ბაზარზე წვდომის სახელმწიფო პროგრამის“ ფარგლებში შექმნილი აქვთ ფერმერული მეურნეობა, ან/და „საპილოტე პროგრამის ქალებისთვის“ ფარგლებში შექმნილი აქვთ სასათბურე მეურნეობა, ან/და „გადამამუშავებელი და შემნახველი საწარმოების თანადაფინანსების პროექტის“ ფარგლებში აქვთ გადამამუშავებელი ან/და შემნახველი საწარმო, ან/და მეცხოველეობის (მსხვილფეხა ან წვრილფეხა პირუტყვის) ფერმა ან/და სასათბურე მეურნეობა.

"პროგრამის პოტენციური ბენეფიციარის მიერ განაცხადით წარდგენილი პროექტი, რომელზეც გაიცემა დახმარება, უნდა დასტურდებოდეს წერილობითი ფორმით შესაბამისი მუნიციპალიტეტების მერიებისაგან შესაბამისი ობიექტის 2025 წლის თებერვლის თვეში გურიისა და იმერეთის რეგიონებში დიდთოვლობის შედეგად დაზიანების ფაქტი.

პროგრამის პოტენციურ ბენეფიციარს, რომელსაც სურს განაცხადით წარდგენილი პროექტით გათვალისწინებული დახმარების მიღება, სააგენტოში 2025 წლის 30 მარტამდე წარდგენილი უნდა ჰქონდეს იმერეთის ან/და გურიის რეგიონებში შესაბამისი ობიექტის მოწყობის დამადასტურებელი დასკვნა, ხოლო „შეღავათიანი აგროკრედიტის პროექტის“ შემთხვევაში შესაძლებელია, შესაბამისი ობიექტის მოწყობა დასტურდებოდეს სააგენტოს მიერ.

პროგრამა ითვალისწინებს ერთი პოტენციური ბენეფიციარისათვის არაუმეტეს ერთი სასათბურე მეურნეობისთვის ან/და ერთი ფერმისთვის/მსხვილფეხა ან/და წვრილფეხა პირუტყვის ფერმისთვის ან/და ერთი შემნახველი აწ/და გადამამუშავებელი საწარმოსათვის მიზნობრივი ერთჯერადი დახმარების გამოყოფას შემდეგი პირობებით:

სასათბურე მეურნეობის აღდგენის შემთხვევაში — პროექტის ღირებულებიდან არაუმეტეს 25,000 ლარის ოდენობით;

ფერმის/მსხვილფეხა ან/და წვრილფეხა პირუტყვის ფერმის აღდგენის შემთხვევაში – პროექტის ღირებულებიდან არაუმეტეს 40,000 ლარის ოდენობით;

შემნახველი ან/და გადამამუშავებელი საწარმოს აღდგენის შემთხვევაში – პროექტის ღირებულებიდან არაუმეტეს 100,000 ლარის ოდენობით.

სააგენტო უზრუნველყოფს დახმარების გაცემას ბენეფიციარის მიერ ხელშეკრულებით გათვალისწინებული ობიექტის აღდგენიდან 2 თვის ვადის შემდეგ.

ფერმერი ვალდებულია ფერმის აღდგენისთვის დახმარების მიღებიდან 2 წლის განმავლობაში არ გაასხვისოს სასათბურე მეურნეობა ან/და ფერმა/მსხვილფეხა ან/და წვრილფეხა პირუტყვის ფერმა ან/და შემნახველი ან/და გადამმუშავებელი საწარმო და შეინარჩუნოს საქმიანობის პროფილი",- ვკითხულობთ მთავრობის განკარგულებაში.

თებერვლის თვეში, ერთკვირიანმა დიდთოვლობამ იმერეთისა და გურიის მუნიციპალიტეტებში მნიშვნელოვანი პრობლემები შექმნა, როგორც ტრანსპორტით გადაადგილების, ასევე საცხოვრებელი სახლების დაზიანების, ელექტროენერგიისა და ბუნებრივი აირის მიწოდების კუთხით.