„ჩვენ ვაპირებთ 64-ვე მუნიციპალიტეტში, როგორც მერის, ისე საკრებულოს
არჩევნების მოგებას", - ამის შესახებ "ოცნების" პრემიერ-მინისტრმა
ირაკლი კობახიძემ ჟურნალისტებს განუცხადა.
მისი თქმით, მმართველი პარტიის მოგება გარდაუვალია.
"ბუნებრივია, [თვითმმართველობის არჩევნებზე] ოპოზიციას არ აქვს
არავითარი შანსი. ჩვენ ვაპირებთ 64-ვე მუნიციპალიტეტში, როგორც მერის,
ისე საკრებულოს არჩევნების მოგებას და ეს არის გარდაუვალი. ყველა
ხედავთ, როგორა მმართველი პარტიის რეიტინგი, როგორია ოპოზიციური
პარტიების რეიტინგები, შესაბამისად, ვერაფერი დაუდგება წინ ამ შედეგის
მიღწევას. გავიმეორებ, ჩვენი მიზანია 64-ვე მუნიციპალიტეტში, როგორც
მერის, ისე საკრებულოს არჩევნების მოგება,", -განაცხადა
კობახიძემ.
საქართველოს მასშტაბით 163-ე დღეა უწყვეტი საპროტესტო აქციები
მიმდინარეობს. მოქალაქეები ხელახალ არჩევნებს და აქციების დროს
უკანონოდ დაკავებულთა გათავისუფლებას მოითხოვენ.
მუნიციპალიტეტის წარმომადგენლობითი ორგანოს – საკრებულოს და
თვითმმართველი ქალაქის/თვითმმართველი თემის მერის არჩევნები 2025 წლის
ოქტომბრის პირველ შაბათს, 4 ოქტომბერს ჩატარდება.
2025 წელს ადგილობრივი თვითმმართველობის არჩევნები იგივე წესით
ჩატარდება, როგორითაც 2017 წელს ჩატარდა.
ამ ფორმატის მიხედვით, თვითმმართველი თემის საკრებულო დაკომპლექტდება
პროპორციული საარჩევნო სისტემით არჩეული 15 წევრისაგან და შესაბამის
ტერიტორიაზე არსებული ყველა დასახლებიდან, სოფლიდან, დაბიდან,
ქალაქიდან, რომლებიც შედის ამ თვითმმართველი თემის შემადგენლობაში,
მაჟორიტარული საარჩევნო სისტემით არჩეული თითო წევრისგან.
მასალის გამოყენების პირობები