ქუთაისიპოსტი

ქუთაისის 2025 წლის ბიუჯეტში ცვლილება შევიდა, რის შედეგადაც ქალაქის მთავარი საფინანსო დოკუმენტი 41 მილიონ 28 ათასი ლარით გაიზარდა.

მერიის საფინანსო სამსახურის ხელმძღვანელის დავით ნიშნიანიძის განმარტებით, მუნიციპალიტეტს 40 მილიონი ლარი საქართველოს მთავრობამ გამოუყო, რომელიც ინფრასტრუქტურულ პროექტებს მოხმარდება. 

კერძოდ, აღნიშნული თანხა გათვალისწინებულია გზების, მრავალასართულიანი ბინების, ლიფტების, ფასადების, სახურავებისა და სანიაღვრე სისტემების რეაბილიტაციისთვის, ასევე სკვერების მოწყობისთვის.

დავით ნიშნიანიძის თქმით, 40 მილიონიდან 7 მილიონი ლარი ქალაქის დასუფთავებისათვის საჭირო სხვადასხვა სახეობის სპეცტექნიკისა და ნაგავშემკრები კონტეინერების შეძენისთვის დაიხარჯება.

"ქალაქში, დასუფთავების პრობლემების აღმოფხვრის მიზნით, მოხდება სპეცტექნიკის შეძენა. შევიძენთ ჯამში 12 ერთეულ ნაგავმზიდს, 2 ერთეულ ტრაქტორს, ტროტუარების საწმენდ ტექნიკას და 22 მეტრიან ამწეკალათს, ასევე 1000 ერთეულ ნაგავშემკრებ კონტეინერს",- განმარტა დავით ნიშნიანიძემ.

მისივე თქმით, მთავრობამ ასევე გამოყო 1 მილიონი ლარი სტიქიის სალიკვიდაციო ღონისძიებებისთვის, რაც საყრდენი კედლების რეაბილიტაციას მოხმარდება.

ბიუჯეტში განხორციელებული ცვლილების შედეგად, ქუთაისის მთავარი საფინანსო დოკუმენტის მოცულობა, ჯამში, 178 მილიონ 328 300 ლარს შეადგენს.

ქალაქის ბიუჯეტის საწყისი მოცულობა (დამტკიცების პერიოდში) 117 097.80 ლარი იყო.