ქუთაისიპოსტი

დღეს, 7 მარტს, ქვეყანაში, პროევროპული აქციების დაწყებიდან 100 დღე გავიდა.

სწორედ ამდენი დღეა, რაც საქართველოს სხვადასხვა ქალაქში, ქუჩაში არაერთი დემონსტანტია გამოსული და ახალ საპარლამენტო არჩევნებს ითხოვს.

ამასთან, მათი მთავარი მოთხოვნაა, "ოცნების" მთავრობამ დაუყონებლივ გაათავისუფლოს საპროტესტო აქციების დროს დაკავებულები. 

პროევროპული აქციების მონაწილეები პროტესტის 100-ე დღესაც ქუჩაში გამოვლენ. „ბოლომდე“ - ამ სლოგანით ისინი, თბილისსა და რეგიონებში მასშტაბურ საპროტესტო აქციებს გამართავენ.

დემონსტრანტები  ამბობენ, რომ სახელმწიფო მათი პროტესტის ჩასახშობად ყველა რეპრესიულ მეთოდს იყენებს, თუმცა ამის მიუხედავად, პროტესტი არ ჩაქრა.

მოქალაქეების თქმით, ვერც შიში, ვერც ძალადობა და ვერც ტერორი ვერ გატეხავს იმ ადამიანებს, ვინც 100 დღეა, თავისუფლების, სამართლიანობისა და საქართველოს ევროპული მომავლისთვის იბრძვის. 

"მასობრივი პროტესტის მე-100 დღეს შევიკრიბებით ძალიან ბევრი საქართველოს მოქალაქე. კიდევ ერთხელ მოვითხოვთ საოკუპაციო რეჟიმის გაშვებას და ყველას დავანახებთ, რომ ჩვენ არ შევეგუებით ხელისუფლების უზურპაციას და დიქტატურის
დამყარებას! ჩვენ ვიბრძოლებთ ბოლომდე და არ დავუშვებთ ქვეყნის მომავლის მოპარვას!",- ამბობენ დემონსტანტები. 

საპროტესტო აქციების განრიგი:

თბილისი:

18:00 - აქცია/მსვლელობა: არქიტექტორები სოლიდარობისთვის! - თბილისის მერია;   

19:00 - სტუდენტების, ლექტორებისა და პროფესორების ერთობლივი აქცია/მსვლელობა - თსუ-ს პირველი კორპუსი;

19:00 - პროტესტი საზოგადოებრივ მაუწყებელთან;

19:00 - მსვლელობა: თავისუფლება სინდისის პატიმრებს! - პირველი არხის ეზოდან (კოსტავას 68);

20:00 – პროტესტის მეასე დღე: ბოლომდე! - პარლამენტთან;

21:00 - საჯარო ლექცია საპროტესტო აუდიტორიის მიერ - ილიას და აკაკის ძეგლთან;

21:30 – საჯარო დისკუსია: რუსულ რეჟიმთან ბრძოლის 100 დღე - მიღწევები, გამოწვევები, სამომავლო ნაბიჯები - ქართული სახვითი ხელოვნების მუზეუმის წინ

ახმეტა: 17:00 - პროტესტი: პროტესტის 100 დღე - მერიასთან

გორი: 17:00 - გათავისუფლდნენ რეჟიმის ტყვეები და დაინიშნოს ხელახალი არჩევნები! - საკრებულოს წინ

ახალციხე: 18:00 - პროტესტი - შოთა რუსთაველის ძეგლთან

ბათუმი: 19:00 - სამშობლოს სამსახურში! - საკონსტიტუციო სასამართლოსთან

ზუგდიდი: 18:00 - ბრძოლა გამარჯვებამდე - სამხარეო ადმინისტრაციის წინ

თელავი: 18:00 - უწყვეტი პროტესტი თელავში - მერიის წინ

ჩხოროწყუ: 20:00 - გაბედე პროტესტი ყოველდღე! - მერიის წინ

ქუთაისი: 18:00 - აქ საქართველო იბრძვის! უწყვეტი პროტესტის 100 დღე! - მერიის წინ

საქართველოს ქალაქებში საპროტესტო გამოსვლები 28 ნოემბრიდან დაიწყო, მას შემდეგ, რაც „ქართული ოცნების" ხელისუფლებამ გადაწყვიტა 2028 წლის ბოლომდე დღის წესრიგში არ დააყენოს ევროკავშირთან მის წევრობაზე მოლაპარაკების გახსნის საკითხი და 2028 წლის ბოლომდე უარი თქვას ევროკავშირის საბიუჯეტო გრანტებზე.

ბოლო ორი თვის განმავლობაში, პოლიციამ იძალადა აქციის არაერთ მონაწილეზე, მათ შორის ჟურნალისტებზე, რომლებიც პროცესებს აშუქებდნენ. ამ დრომდე არცერთი მათგანი დაკავებული არ არის.