ქუთაისის მერიაში 2024 წლის ბიუჯეტის პროექტზე მუშაობენ, თუმცა არ იციან, იქნება თუ არა ჩასმული ქალაქის მთავარ ფინანსურ დოკუმენტში „ახალდაქორწინებული ოჯახების შექმნის წახალისების" პროგრამა.

"ბიუჯეტის დამტკიცების შემდეგ ინფორმაცია განთავსდება ქუთაისის მუნიციპალიტეტის მერიის ოფიციალურ ვებ-გვერდზე", - აღნიშნულია ჩვენ მიერ გამოთხოვილ ინფორმაციაში.

"ახალდაქორწინებული ოჯახების შექმნის წახალისების" ქვეპროგრა, რომელიც 2021 წლიდან მუშაობს და გაწერილი გეგმის მიხედვით, 2023 წლის ჩათვლით, 30 ბენეფიციარს (წლიურად 10 ადამიანს) უნდა  ესარგებლა, მხოლოდ 7-მა გამოიყენა. 2021 წელს ის საერთოდ ჩავარდა, 2022 წელს მხოლოდ ერთმა წყვილმა ისარგებლა, მიმდინარე წელს კი - ექვსმა. ეს კი იმას ნიშნავს, რომ პროგრამა წარუმატებელი აღმოჩნდა. 

ქუთაისის ადგილობრივ ბიუჯეტში განსაზღვრული „ახალდაქორწინებული ოჯახების შექმნის წახალისების" ქვეპროგრამის ბიუჯეტი 5 000 ლარს შეადგენს, თუმცა, ამ ხნის განმავლობაში, ქალაქში, სოციალური შემწეობის მიმღებთა ზრდის მიუხედავად, ადგილობრივმა თვითმმართველობამ, სამი წელია, მათთვის განსაზღვრული თანხის სრულად ათვისება ვერ შეძლო.

უკავშირდება თუ არა ეს მერიის მხრიდან აღნიშნული პროგრამის შესახებ ბენეფიციარების ინფორმირებულობის სათანადოდ ვერ უზრუნველყოფას, ამაზე ადგილობრივ თვითმმართველობაში განმარტავენ, რომ ისინი სხვადასხვა მიმართულებით ახდენენ ინფორმირებას.  

„ქვეპროგრამის მიმდინარეობის შესახებ ინფორმაციის მიწოდების მიზნით წერილობით მიემართა: სოციალური მომსახურების სააგენტოს იმერეთის რეგიონალურ სერვის ცენტრს; ქალაქ ქუთაისში არსებულ სამშობიარო სახლებს; ინფორმაცია გავრცელდა ტელე და რადიო მაუწყებლობის და სოციალური ქსელის საშუალებით, ასევე განთავსებულ იქნა მერიის ოფიციალურ ვებ-გვერდზე“,- აღნიშნულია წერილში.

“ახალდაქორწინებული ოჯახების შექმნის წახალისების" ქვეპროგრამა ადგილობრივ ბიუჯეტში პირველად 2021 წელს გაჩნდა.

პროგრამის ფარგლებში, ქალაქში მცხოვრები ახალდაქორწინებული წყვილები, რომელთაგან ერთს მაინც აქვს სოციალურად დაუცველის სტატუსი, მერიისგან 500 ლარს მიიღებს. ფულადი დახმარების მისაღებად წყვილმა ქორწინებიდან არაუგვიანეს 30 დღეში უნდა მიმართოს. განცხადებას თან უნდა ერთვოდეს წყვილის პირადობის მოწმობები, ქორწინების მოწმობა და საბანკო რეკვიზიტები.

ქუთაისის მერიის ინფორმაციით, მიმდინარე წელს, ქალაქში 31 სოციალური ქვეპროგრამა განხორციელდა, რომლის თანხობრივმა მოცულობამ, დამტკიცებული ბიუჯეტის მიხედვით, ჯამში 6 534 200 ლარი შეადგინა. აღნიშნული ქვეპროგრამებით კი 11 989 ბენეფიციარმა ისარგებლა.


ამავე თემაზე:

ჩავარდნილი პროგრამა - მერიამ სოციალურ დაუცველებზე განსაზღვრული თანხა ვერ აითვისა

ქუთაისის მერია ოჯახების შექმნის მიზნით ერთჯერადი დახმარებით წყვილებს წელსაც წაახალისებს

ქუთაისში მცხოვრები ახალდაქორწინებულები 500 ლარს მიიღებენ