ქუთაისიპოსტი

ქუთაისში, ზურაბ ჭავჭავაძის  ქუჩის  #2-ში მცხოვრებლები საბავშვო ატრაქციონების მოწყობას ითხოვენ.
ცხრასართულიან საცხოვრებელ კორპუსში, სადაც  128 ოჯახი ცხოვრობს, მათ შორის, მოზარდებიც, არანაირი გასართობი ატრაქცია არ არის მოწყობილი. 

„შეწუხებულები ვართ, არ აქვთ ჩვენს შვილებს არანაირი გასართობი  ატრაქცია.  ამიტომ, უკანა ბინების გასართობ სასრიალოებსა თუ სავარჯიშოებზე დავეძებთ ბავშვებს. იმდენი ბავშვია იქაც და ისე ცოტა ატრაქციონი, იქაც არ აცლიან ჩვენს შვილებს ყოფნას და არის ბავშვებს შორის სულ უკმაყოფილება. ხან სად დავეძებთ ბავშვებს და ხან სად, არადა შვილები გვინდა, რომ ჩვენს თვალწინ, ეზოში ერთობოდნენ“, - განმარტავს ადგილობრივი ფერიდე ამბროლაძე.

ზ. ჭავჭავაძის #2-ში მცხოვრებლები დახმარებას დიდი ხანია ითხოვენ, თუმცა, ადგილობრივების თქმით,  ადგილობრივი თვითმმართველობის წარმომადგენლები მათთან მხოლოდ არჩევნების წინ ჩნდებიან. 

„თქვენ იქნებ დაგვეხმაროთ, რომ მოგვაქციონ ყურადღება, უპატრონოდ ვართ. ხელისუფლებას მაშინ ვახსენდებით როცა არჩევნებია, ამ დროს მოდიან და დაპირებებს გასცემენ, არჩევნების ჩავლის შემდეგ კი აქ მოსასვლელადაც აღარ იწუხებენ თავს“,- ამბობს ლაურა დემეტრაძე.

ზ. ჭავჭავაძის დასახლება ავტოქარხნის სამაჟორიტაროს ეკუთვნის, რომლის დეპუტატიც მიხეილ გიორგაძეა. მისი განმარტებით, აღნიშნულ ტერიტორიაზე სპორტული მოედნის მოწყობა იგეგმება. 

„ჩვენ ამ ტერიტორიაზე შევპირდით მოსახლეობას სტადიონის მოწყობას და გვინდა, ეს დაპირება შევუსრულოთ. გაკეთდება თანამედროვე სტანდარტების სათამაშო სტადიონი. ტენდერი უნდა გამოცხადდეს და ალბათ, წლის ბოლომდე მოესწრება", - ამბობს მიხეილ გიორგაძე.

უბნის მაჟორიტარის თქმით, ტენდერის გამოცხადებამდე იგი ადგილზე მივა და ტერიტორიას დაათვალიერებს.