ტყიბულში, ძიძიგურისა და მინდელის შახტების მმართველი კომპანია მეშახტეების პროტესტს უმიზეზოს უწოდებს და აცხადებს, რომ შახტების დროებითი დახურვა მეშახტეთა ჯანმრთელობაზე ზრუნვით არის განპირობებული.
ვრცელ განცხადებაში უკრაინული კომპანია განმარტავს, რომ ძიძიგურის შახტში, ამწე-დანადგარზე ბაგირებს ექსპლუატაციის ვადა აქვს ამოწურული, რომლის შეცვლა რამდენიმე კვირას გაგრძელდება. მეშახტეების მოთხოვნა კი ამ პერიოდის ანაზღაურების შესახებ, არ დაკმაყოფილდება.
„სამწუხაროდ, ბოლო დღეების განმავლობაში, ქალაქ ტყიბულში კვლავ გრძელდება მეშახტეთა სრულიად უმიზეზო პროტესტი, რაც გამოიწვია ძიძიგურის შახტის შესასვლელის დროებით დახურვამ. მთავარი მიზეზი, რის გამოც კომპანიამ ეს გადაწყვეტილება მიიღო, არის მეშახტეთა სიცოცხლესა და მათ ჯანმრთელობაზე ზრუნვა. კერძოდ, ტექნიკური და სამშენებლო ზედამხედველობის სააგენტოს მიერ მოწოდებული დასკვნის თანახმად, ძიძიგურის შახტის ამწე-დანადგარზე ბაგირებს ექსპლუატაციის ვადა აქვს ამოწურული და საჭიროებს ცვლილებას. დასკვნის შესაბამისად, კომპანიამ ბაგირის გამოცვლის პროცედურა უნდა დაიწყოს, რაც რამდენიმე კვირას გაგრძელდება და დასრულებისთანავე შახტის ჩასასვლელი გაიხსნება.
კომპანიამ თითოეულ მეშახტეს მყარი გარანტია მისცა, რომ არ იგეგმება არცერთი ადამიანის შემცირება, არ იგეგმება ხელფასის კორექტირება და ჩვენი გეგმები მხოლოდ და მხოლოდ მათი სამუშაო პირობების გაუმჯობესებას უკავშირდება.
მიუხედავად ამისა, გუშინდელ შეხვედრაზე, რომელსაც კომპანიის
მენეჯმენტის გარდა ეკონომიკის სამინისტროს წარმომადგენელიც
ესწრებოდა, მეშახტეებმა წამოაყენეს მოთხოვნა, რომ ისინი ბაგირების
გამოცვლის პროცესში არ იმუშავებენ, თუმცა ითხოვენ ანაზღაურებას
და სამუშაო პროცესს მხოლოდ მას შემდეგ დაუბრუნდებიან, როდესაც
ძიძიგურის შახტის სარემონტო სამუშაოები დასრულდება. ცალსახად
ვაცხადებთ, რომ ეს პირობა კომპანიისთვის კატეგორიულად მიუღებელია.
ასევე, მიუღებელია პროტესტი იმ ფონზე, როდესაც კომპანიის მიერ
მიღებული ყველა გადაწყვეტილება ემსახურება", - ნათქვამია
კომპანიის მიერ გავრცელებულ განცხადებაში.
ტყიბულში, ძიძიგურის შახტში დასაქმებულები პროტესტს მესამე დღეა აგრძელებენ. ისინი შახტების
მმართველი კომპანიის შეთავაზებას, მინდელის სახელობის შახტში დროებით
გადაყვანის შესახებ არ ეთანხმებიან, რადგან შიშობენ, რომ ეს მათი
სამუშაო ადგილების შემცირებას გამოიწვევს. გაფიცულებმა დღეს მინდელის შახტთან
გადაინაცვლეს და აცხადებენ, რომ თუ მათი მოთხოვნები არ
დაკმაყოფილდება, პროტესტი უფრო მასშტაბური გახდება.
„coal of gerogia”-ს
დირექტორი მიხეილ სოცკი შახტში სამუშაო პროცესის დროებით შეჩერებას და
დასაქმებულების სხვა სამუშაო ადგილზე გადაყვანას ობიექტზე ტექნიკური
რემონტის საჭიროებით ხსნის და აცხადებს, რომ შახტის დახურვას და
თანამშრომლების შემცირებას არ აპირებს.
ამავე თემაზე:
ტყიბულში მეშახტეები გაიფიცნენ
ტყიბულის შახტის მფლობელის პირველი კომენტარი
გაფიცვაზე
შახტის ყოფილი თანამშრომელი ხვიჩა გაბუნია ფეისბუქპოსტში წერს, რომ საწარმოში გახშირებული ავარიები მოშლილი სისტემის შედეგია და არსებული მდგომარეობის გაგრძელებამ შესაძლოა შახტის დახურვა და ასობით ადამიანის უმუშევრად დარჩენა გამოიწვიოს.
მისი განცხადებით, მძიმე მდგომარეობაა ნახშირის მომპოვებელ უბნებზეც, სადაც დასაქმებულებს მუშაობა მაღალი რისკის პირობებში უწევთ. გაბუნიას თქმით, არ ხდება ტექნიკის განახლება და მოძველებული მექანიზმების ახლით ჩანაცვლება, ხოლო საწარმოს მართვაში გამოცდილი კადრების როლი შემცირებულია.
შახტის ყოფილი თანამშრომელი არსებულ ვითარებას 2018 წლის პერიოდს ადარებს, როდესაც, მისი თქმით, საწარმოში ავარიები და ფატალური შემთხვევები გახშირებული იყო. ის იხსენებს მეშახტეების მაშინდელ პროტესტსაც, რომელშიც თავად მონაწილეობდა და რომლის მიზანი საწარმოში მდგომარეობის გაუმჯობესება იყო.
გაბუნია მეშახტეებს მოუწოდებს, სამუშაო პირობებთან დაკავშირებულ რისკებზე ხმა აიმაღლონ. მისი შეფასებით, პრობლემების მოუგვარებლობამ შესაძლოა შახტის დახურვა და ტყიბულში ასობით ადამიანის უმუშევრად დარჩენა გამოიწვიოს.
"ბოლო დროს, შახტში ხშირია მარცხი, რომელიც სავალალო შედეგებით მთავრდება, ნახშირმომპოვებელი უბნები, ერთმანეთის მოყოლებით ფეთქდება და იწვის. რისი თქმა მინდა მეგობრებო, ამ წარმოებაში, მოშლილა სისტემა.
ორმა არაპროფესიონალმა ადამიანმა, ერთპიროვნულად ჩაიგდო ხელთ, მართვის სტრუქტურა. გამოცდილ კადრებს, რომლებიც თითზე ჩამოსათვლელი დარჩა ამ წარმოებაში, ( ჩემი პატივისცემა მათ) აღარაფერს ეკითხებიან. წარმოების სადავეები რამოდენიმე ნარკომანს და სოცკისთან დაახლოებული, არაპროფესიონალ კადრებს უჭირავს, რაც იწვევს შახტში, მოხშირებულ მარცხებს. ყველა, მექანიზმი და სატრანსპორტო საშვალება, რომელიც ემსახურება, მშრომელების გადაადგილებას და ნახშირის ტრანსპორტირებას, შახტიდან ზედაპირამდე , თითქმის 100% -ით გამოსულია მწყობრიდან, რაც საფრთხეს უქმნის მეშახტეთა სიცოცხლეს.
ნახშირ მომპოვებელი უბნები, კატასტროფულ მდგომარეობაშია, იქ ადგილზე მომუშავე პერსონალი, ძალიან დიდი რისკის ქვეშაა. არანაირი გადაიარაღება და ახლით ჩანაცვლება არ ხდება, რაც წარმოებას საბოლოოდ მიიყვანს დაკეტვის პირას და 100 ობით ადამიანის უმუშევრად დარჩენას. რისი თქმა მინდა მეგობრებო? ეს წარმოება უბრუნდება, 2018 წლის ნიშნულს, მარცხისა და სიკვდილიანობის მხრივ, როდესაც მოცემულ წლებში, ყოველ სამ თვეში, ათობით ადამიანი, მარცხდებოდა და იღუპებოდა. მაშინ, პირადად მე, ყველა მეშახტემ, ვისთვისაც ღირებილი იყო ადმიანის სიცოცხლე, გული შესტკიოდა წარმოების მომავალზე ხმა ამოვიღეთ და მიზანსაც მივაღწიეთ.
უპირველეს ყოვლისა, წლების განმავლობაში, აღარ ხდებოდა შახტში მარცხი, წარმოებაც შევინახეთ და გადავარჩინეთ. მეამაყება, მაშინდელ წლებში პროტასტის, რომელსაც პირადად მე,100 ობით მეშახტესთან ერთად ვხემძღვანელობდით და შედეგიც დავდეთ, ეს ყველა მეშახტეს კარგად ახსოვს. ამიტომ იყო, რომ წლების შემდგომ, არ მაპატიეს, მეშახტეების გვერჩიდგომა, ყველა მათ არასწორ გადაწყვეტილებაზე ხმის ხმამაღლა ამოღება და სისტემამ, მომიშორა თავიდან. მინდა მივმართო ყველა მეშახტეს! ხმა ამოიღეთ მეგობრებო, ყველა იმ რისკებზე, რაც თქვენ ჯამთელობას და სიცოცხლეს უქმნის საფრთხეს, თორემ შემდგომ, ჯვარი დაგწეროთ ღმერთმა გვიანი იქნება", - წერს შახტის ყოფილი თანამშრომელი.
„ქუთაისიპოსტი“ შახტში არსებულ მდგომარეობასთან დაკავშირებით საწარმოს ადმინისტრაციის პოზიციის გარკვევას შეეცდება.
საქართველოს პროკურატურამ რუსთავის N6 საპატიმრო დაწესებულებაში მოთავსებული მსჯავრდებულის, გიორგი დავითაძის მიმართ განხორციელებული შესაძლო სექსუალური ძალადობის ფაქტზე მიმდინარე გამოძიება დაასრულა.
მასალის გამოყენების პირობები