ქუთაისიპოსტი

ბინათმესაკუთრეთა ამხანაგობებს სადარბაზოების კეთილმოწყობა ნაწილობრივ საკუთარი ხარჯებით მოუწევთ.

სანაცვლოდ, მერია იმ პროექტებს დაამზადებს, რომლის მიხედვითაც კორპუსებში სადარბაზოები უნდა გარემონტდეს.

ქუთაისის მერიაში აცხადებენ, რომ მოსახლეობის მიერ წარდგენილი პროექტები ხშირად საჭიროებდა კორექტირებას, ამიტომ უმჯობესია, მათი შედგენა მერიამ  უზრუნველყოს.

„პროექტები ხშირ შემთხვევაში არ იყო გამართული, ხშირად საჭიროებდა კორექტირებას, ჩასწორებას და  შესასრულებლად იყო რთული. ამიტომ,  მერიამ გადაწყვიტა ტენდერის გზით თვითონ უზრუნველყოს მათი დამზადება. ის 5%, რასაც სამუშაოებში გადაიხდის მოსახლეობა, არის თითქმის იგივე თანხა, რაც მათ პროექტის დამზადება უჯდებოდათ“, – ამბობს საბინაო სამსახურის წარმომადგენელი,  კობა ჯაბუა.

სადარბაზოებში სარემონტო სამუშაოების პროექტების დასამზადებლად საბინაო სამსახური  დამატებით 400 000 ლარს ითხოვს. ქუთაისის მერია „ბინათმესაკუთრეთა ამხანაგობების“ პროგრამებისთვის ამ დრომდე 700 000 ლარს ხარჯავდა.

ეს ერთ–ერთი შენიშვნაა, რაც 2020 წლის ბიუჯეტის პროექტში რეკომენდაციის სახით ჩაიწერება. ქალაქის მთავარი ფინანსური დოკუმენტი აღმასრულებელს შესწორებებისთვის უკვე გადაეგზავნა.