ქუთაისიპოსტი

„საერთაშორისო გამჭვირვალობა-საქართველომ“ თანამდებობის პირების ქონებრივი დეკლარაციების შესახებ მორიგი კვლევა გამოაქვეყნა.

კვლევის მიხედვით, იუზა უგულავა ამ დრომდე განკარგავს  მის  50%-იან წილს შპს „უიკოში“ და თანამდებობაზე ყოფნის მიუხედავად მართვის უფლება არავისთვის გადაუცია.

მართვის უფლება არ დაუთმია არც ნიკოლოზ ლატარიას მის ოთხ კომპანიაში. ქუთაისის საკრებულოს თავმჯდომარეს ქონებრივ დეკლარაციაში მითითებული აქვს, რომ  შპს „ნიკოილი თერჯოლაში“ 50%-ს ფლობს,  40%-ის მფლობელია შპს „გიოში“,  კომპანიის 100% აქვს შპს „ნიკოილი 9“-ში, ხოლო შპს „ფრეშ ფუდში“ 55%-ს განკარგავს, თუმცა, კანონის მოთხოვნის მიუხედავად,  მას არც ერთ კომპანიაში მართვის უფლება სხვა პირისთვის არ გადაუცია.

დირექტორისა და მმართველის პოზიციას ინარჩუნებენ საკუთარ კომპანიებში ხონის მერი, ლადო ჯურხაძე, წყალტუბოს მერის მოადგილე ზაურ მაისურაძე  და ბაღდათის მერის მოადგილე, ფირუზ ჯურხაძე. ფირუზ ჯურხაძეს დეკლარაციაში საერთოდ არ აქვს მითითებული, რომ შპს „ჯორჯია სეთ კომპანი2“-ში 15%-ს ფლობს. ზესტაფონის მერის მოადგილემ კი დეკლარაციაში ის ორი კომპანია საერთოდ არ მიუთითა, სადაც 50%-იან წილებს ფლობს.

ბაღდათის  მერის  მოადგილე არასრულად შევსებული დეკლარაციისთვის ერთხელ უკვე დაჯარიმდა 1000 ლარით. ამჯერად კი ამბობს, რომ დაჯარიმების შემდეგ მან აღნიშნულ  კომპანიაში  წილი გაყიდა.

"ამ ეტაპზე მიმდინარეობს  დოკუმენტაციის გადაფორმების პროცესი,  რაც სავარაუდოდ დეკემბრის ბოლომდე დასრულდება",-აცხადებს ფირუზ ჯურხაძე.

ზესტაფონის მერის მოადგილე, დავით მაღრაძე  კი   ამბობს, რომ არც ერთი კომპანია არ ფუნქციონირებს და დეკლარაციაშიც ამიტომ არ მიუთითა.

“საქმეს რომ დაიწყებ და არ გამოგივა, ასე მოხდა. დიდი ხნის წინ დავაფუძნე ეს კომპანიები, მაგრამ არც ერთ მათგანს არც ერთი დღე არ უმუშავია. ბეჭდებიც არ მახსოვს სად არის. არ ერთი თეთრი არ მიმიღია მაგ კომპანიებიდან. აღარც მახსოვდა მაგთი არსებობა“,-ამბობს დავით მაღრაძე.

ქონება დამალა თერჯოლის საკრებულოს თავმჯდომარის მოადგილემ, ნოდარ ფანჩულიძემაც. მან დეკლარაციაში არ მიუთითა, რომ  შპს „იმერეთი 2016“-ში  100%-იანი წილის მფლობელია.

ქონებრივი დეკლარაციები არასრულად შეავსეს  ჭიათურის მერმა, გივი მოდებაძემ და ხარაგაულის საკრებულოს თავმჯდომარის მოადგილემ რუსუდან გიორგაძემ. მათ დეკლარაციებში არ მიუთითეს, რომ მათი მეუღლეები წილებს ფლობენ კომპანიებში.