საზოგადოების მწვავე კრიტიკის შემდეგ, რაც მმართველი პარტიის მიერ, ტექნოლოგიური უნივერსიტეტის ესკიზური ფოტოების გავრცელებას მოჰყვა, უნივერსიტეტის ადმინისტრაცია ახალ ფოტოებს ავრცელებს. ფოტოებზე ასახულია როგორც მშენებლობის პროცესი, ასევე, უნივერსიტეტის საბოლოო იერსახე, ე.წ. ესკიზი.
ფოტოებს შორის არის საერთო ხედის ესკიზიც, სადაც განაშენიანების
მასშტაბის დანახვაა შესაძლებელი. ეს სწორედ იმ ფოტოს ახალი ვერსიაა,
რომელშიც საზოგადოებამ დაპირებულ და მიმდინარე მშენებლობას შორის
მნიშვნელოვანი განსხვავება დაინახა.
იმის გამო, რომ სამი წლის წინ, უნივერსიტეტის მაკეტის
პრეზენტაციაზე, არავის დაუკონკრეტებია რამდენი და რა ფუნქციური
დანიშნულების კორპუსის მშენებლობა იგეგმებოდა, მედიას კი ადგილზე
შესვლის შესაძლებლობა ამ დრომდე არ ეძლევა, საზოგადოება დაპირებულ და
მიმდინარე მშენებლობის მასშტაბების შედარებას სწორედ სამი წლის
წინანდელ ესკიზსა და ფონდი „ქართუს“ მიერ პერიოდულად გავრცელებულ
ფოტოებს შორის აკეთებს.
ის კი, რაც მაშინ პრეზენტაციაზე ითქვა, უკვე შეიცვალა.
მმართველი პარტიის თავმჯდომარემ, ბიძინა ივანიშვილმა, 2016 წელს,
საპარლამენტო არჩევნებამდე ერთი თვით ადრე, ქუთაისელებს უთხრა, რომ
მუხნარის ტყეში, 2019 წელს 60 000 სტუდენტზე გათვლილი უნივერსიტეტი
გაიხსნებოდა. ადგილზე სამუშაოები დაპირებიდან მხოლოდ ორი წლის
შემდეგ, მიმდინარე წლის გაზაფხულიდან დაიწყო, რამაც ცხადყო, რომ
სასწავლო წლის დასაწყისისთვის უნივერსიტეტის არც ერთი კორპუსი არ
იქნებოდა მზად. ამის შემდეგ ფონდმა „ქართუმ“ საგანმანათლებლო
დაწესებულების გახნის ვადა ერთი წლით გადაწია, პოტენციური სტუდენტების
რაოდენობა კი რადიკალურად შეამცირა. ახლა არც ფონდ „ქართუსა“ და
არც უნივერსიტეტის ადმინისტრაციაში აღარ საუბრობენ 60 000 სტუდენტზე.
საუნივერსიტეტო კომპლექსის პროგრამების კოორდინატორი, თემურ მურღულია
ვარაუდობს, რომ პირველ წელს უნივერსიტეტში 2000–მდე სტუდენტი
ისწავლის, მიმდინარე მშენებლობა კი 15 000 სტუდენტზეა გათვლილი,
თუმცა, ირწმუნება, რომ ეს მხოლოდ პირველი ეტაპია.
ტექნოლოგიური უნივერსიტეტის ესკიზური ფოტოები "ქართული ოცნების"
ფეისბუქგვერდზე 5 სექტემბერს გავრცელდა. ფოტოებზე გამოსახული რეალობა,
რადიკალურად განსხვავდებოდა პირველი ესკიზის მასშტაბებისგან, რამაც
საზოგადოების კრიტიკა გამოიწვია. მომხდარზე უნივერსიტეტის
პროგრამების კოორდინატორმა განაცხადა, რომ ფოტოები არ ასახავს უნივერსიტეტის
საბოლოო სახეს და კონკრეტული ადამიანები საზოგადოების შეცდომაში
შეყვანას ცდილობენ.
როგორი იყო ტექნოლოგიური უნივერსიტეტის
მაკეტი, ნახეთ
აქ:
შახტის ყოფილი თანამშრომელი ხვიჩა გაბუნია ფეისბუქპოსტში წერს, რომ საწარმოში გახშირებული ავარიები მოშლილი სისტემის შედეგია და არსებული მდგომარეობის გაგრძელებამ შესაძლოა შახტის დახურვა და ასობით ადამიანის უმუშევრად დარჩენა გამოიწვიოს.
მისი განცხადებით, მძიმე მდგომარეობაა ნახშირის მომპოვებელ უბნებზეც, სადაც დასაქმებულებს მუშაობა მაღალი რისკის პირობებში უწევთ. გაბუნიას თქმით, არ ხდება ტექნიკის განახლება და მოძველებული მექანიზმების ახლით ჩანაცვლება, ხოლო საწარმოს მართვაში გამოცდილი კადრების როლი შემცირებულია.
შახტის ყოფილი თანამშრომელი არსებულ ვითარებას 2018 წლის პერიოდს ადარებს, როდესაც, მისი თქმით, საწარმოში ავარიები და ფატალური შემთხვევები გახშირებული იყო. ის იხსენებს მეშახტეების მაშინდელ პროტესტსაც, რომელშიც თავად მონაწილეობდა და რომლის მიზანი საწარმოში მდგომარეობის გაუმჯობესება იყო.
გაბუნია მეშახტეებს მოუწოდებს, სამუშაო პირობებთან დაკავშირებულ რისკებზე ხმა აიმაღლონ. მისი შეფასებით, პრობლემების მოუგვარებლობამ შესაძლოა შახტის დახურვა და ტყიბულში ასობით ადამიანის უმუშევრად დარჩენა გამოიწვიოს.
"ბოლო დროს, შახტში ხშირია მარცხი, რომელიც სავალალო შედეგებით მთავრდება, ნახშირმომპოვებელი უბნები, ერთმანეთის მოყოლებით ფეთქდება და იწვის. რისი თქმა მინდა მეგობრებო, ამ წარმოებაში, მოშლილა სისტემა.
ორმა არაპროფესიონალმა ადამიანმა, ერთპიროვნულად ჩაიგდო ხელთ, მართვის სტრუქტურა. გამოცდილ კადრებს, რომლებიც თითზე ჩამოსათვლელი დარჩა ამ წარმოებაში, ( ჩემი პატივისცემა მათ) აღარაფერს ეკითხებიან. წარმოების სადავეები რამოდენიმე ნარკომანს და სოცკისთან დაახლოებული, არაპროფესიონალ კადრებს უჭირავს, რაც იწვევს შახტში, მოხშირებულ მარცხებს. ყველა, მექანიზმი და სატრანსპორტო საშვალება, რომელიც ემსახურება, მშრომელების გადაადგილებას და ნახშირის ტრანსპორტირებას, შახტიდან ზედაპირამდე , თითქმის 100% -ით გამოსულია მწყობრიდან, რაც საფრთხეს უქმნის მეშახტეთა სიცოცხლეს.
ნახშირ მომპოვებელი უბნები, კატასტროფულ მდგომარეობაშია, იქ ადგილზე მომუშავე პერსონალი, ძალიან დიდი რისკის ქვეშაა. არანაირი გადაიარაღება და ახლით ჩანაცვლება არ ხდება, რაც წარმოებას საბოლოოდ მიიყვანს დაკეტვის პირას და 100 ობით ადამიანის უმუშევრად დარჩენას. რისი თქმა მინდა მეგობრებო? ეს წარმოება უბრუნდება, 2018 წლის ნიშნულს, მარცხისა და სიკვდილიანობის მხრივ, როდესაც მოცემულ წლებში, ყოველ სამ თვეში, ათობით ადამიანი, მარცხდებოდა და იღუპებოდა. მაშინ, პირადად მე, ყველა მეშახტემ, ვისთვისაც ღირებილი იყო ადმიანის სიცოცხლე, გული შესტკიოდა წარმოების მომავალზე ხმა ამოვიღეთ და მიზანსაც მივაღწიეთ.
უპირველეს ყოვლისა, წლების განმავლობაში, აღარ ხდებოდა შახტში მარცხი, წარმოებაც შევინახეთ და გადავარჩინეთ. მეამაყება, მაშინდელ წლებში პროტასტის, რომელსაც პირადად მე,100 ობით მეშახტესთან ერთად ვხემძღვანელობდით და შედეგიც დავდეთ, ეს ყველა მეშახტეს კარგად ახსოვს. ამიტომ იყო, რომ წლების შემდგომ, არ მაპატიეს, მეშახტეების გვერჩიდგომა, ყველა მათ არასწორ გადაწყვეტილებაზე ხმის ხმამაღლა ამოღება და სისტემამ, მომიშორა თავიდან. მინდა მივმართო ყველა მეშახტეს! ხმა ამოიღეთ მეგობრებო, ყველა იმ რისკებზე, რაც თქვენ ჯამთელობას და სიცოცხლეს უქმნის საფრთხეს, თორემ შემდგომ, ჯვარი დაგწეროთ ღმერთმა გვიანი იქნება", - წერს შახტის ყოფილი თანამშრომელი.
„ქუთაისიპოსტი“ შახტში არსებულ მდგომარეობასთან დაკავშირებით საწარმოს ადმინისტრაციის პოზიციის გარკვევას შეეცდება.
საქართველოს პროკურატურამ რუსთავის N6 საპატიმრო დაწესებულებაში მოთავსებული მსჯავრდებულის, გიორგი დავითაძის მიმართ განხორციელებული შესაძლო სექსუალური ძალადობის ფაქტზე მიმდინარე გამოძიება დაასრულა.
მასალის გამოყენების პირობები