ქუთაისიპოსტი

ქუთაისის სააპელაციო სასამართლოში კაფე“სავანესა“ და ქუთაისის მერიას შორის მიმდინარე დავაზე მორიგი პროცესი გაიმართა.

კაფის მეპატრონეები სხდომაზე წარწერებიანი მაისურებით „გვართმევენ“ მივიდნენ. მათი თქმით, მერიასთან მორიგება შეუძლებელია და ისინი საკუთრებას არ დათმობენ.

საქმე ეხება,  ცენტრალურ ბულვარში მდებარე კაფეს, რომელიც შპს „ნიკოლომ“ 1995 წელს შეიძინა. კაფის მფლობელები ამბობენ, რომ შენობასთან ერთად მათ მიწის ნაკვეთიც შეისყიდეს, თუმცა, მიწაზე საკუთრების უფლების აღიარებას ამ დრომდე ვერ მიაღწიეს. ქუთაისის მერია კი ამბობს, რომ ბულვარის ტერიტორია, რომელიც მუნიციპალიტეტის საკუთრებაშია, სკვერს წარმოადგენს. სკვერის გასხვისება კი კანონით აკრძალულია. შესაბამისად, სადავო მიწის ნაკვეთი „სავანესი“ ვერასდროს იქნებოდა. გარდა ამისა, მერიის ინფორმაციით „ნიკოლოს“ მის მიერ შეძენილი ბამბუკის მსუბუქი კონსტრუქცია ტერიტორიიდან უნდა გაეტანა.

ადვოკატმა დოკუმენტის საქმეზე დართვა მოითხოვა. შუამდგომლობას არ დაეთანხმა მერიის იურისტი, ირაკლი გიორგაძე და განაცხადა, რომ ის, რასაც მხარე მტკიცებულებას უწოდებს, ერთად შეკრული რამდენიმე ფურცლის  ასლია, რომელიც დოკუმენტად ვერ ჩაითვლება. გიორგაძის წინააღმდეგობის მიუხედავად მოსმართლეთა კოლეგიამ შუამდგოლობა დააკმაყოფილა და მხარის მიერ წარმოდგენილი მასალები საქმეს დაურთო.

სასამართლომ თავისი ინიციატივით მთავარ საქმეს ასევე დაურთო  ქუთაისის  მერიასა და კაფე „სავანეს“ შორის 1996 წელს  გაფორმებული 5 წლიანი იჯარის ხელშეკრულება. მოსამართლეთა თქმით,  საქმეში არ არის  არც ერთი დოკუმენტი, რომელიც ასახავს რა მოხდა 5 წლის შემდეგ, როცა მხარეებს შორის ხელშეკრულების ვადა ამოიწურა. ასევე, არ არსებობს იჯარის თანხის გადახდის დამადასტურებელი ქვითრები. შესაბამისად, დაუდგენელია ასრულებდა თუ არა შპს „ნიკოლო“ მერიის წინაშე აღებულ ვალდებულებას. თავის მხრივ შეკითხვები არსებობს ქუთაისის მერიის მისამართით, რატომ არ ითხოვდა მუნიციპალიტეტი იჯარით განსაზღვრულ თანხას.

სხდომაზე ერთ-ერთი მთავარი საკითხი იყო ქუთაისის მერიის  დაკვეთით მომზადებული ბულვარის აზომვითი ნახაზი, სადაც კაფე „სავანე“ დატანილი არ არის. მერიის იურისტმა განაცხადა, რომ თუ ნახაზზე, რომლითაც მერიამ ბულვარის ტერიტორია საკუთრებაში დაირეგისტრირა, გასხვისებულ  კაფეს ასახავდნენ,  გამოვიდოდა, რომ მერია კაფესაც თავის საკუთრებად აცხადებდა. ირაკლი გიორგაძის ეს პოზიცია არ გაიზიარა სასამართლომ.  სასამართლოს თავმჯდომარის თქმით, მერიას ნახაზზე რეალობა უნდა აესახა.