ახალი ამბები
გეგუთის ციხეში მოკლული გიგა ფარტენაძის საქმეზე მსჯავრდებულმა, დასკვნითი სიტყვა წარმოთქვა
FaceBook
ქუთაისის სააპელაციო სასამართლოში, 2014 წელს, გეგუთის ციხეში მოკლული გიგა ფარტენაძის საქმეზე მორიგი პროცესი გაიმართა.
სხდომას საქმეზე სამი მსჯავრდებულიდან მხოლოდ ერთი, შოთა შანიძე ესწრებოდა.  

მსჯავრდებულმა დასკვნითი სიტყვის წარმოთქმა გრაფიკული ვიდეომასალის თანხლებით მოითხოვა, რაც მისი თქმით, მის უდანაშაულობას დაადასტურებდა, თუმცა, დაცვის მხარეს არ უთქვამს, კონკრეტულად რა ინფორმაციის შემცველია ფირი.

ვიდეო ფირის სასამართლოს დარბაზში ჩართვას არ დაეთანხმნენ საქმეზე მსჯავრდებული ორი პირის –გიორგი სეხნიაშვილისა და ლევან მოისწრაფიშვილის ადვოკატები. მათი თქმით, ჩანაწერის შესახებ მათთვის ცნობილი არ იყო და არ იციან მისი  შინაარსი რა გავლენას მოახდენს  მათი დაცვის ქვეშ მყოფების ინტერესებზე.

შანიძის ადვოკატის შუამდგომლობა, სასამართლოს დარბაზში ვიდეო ფირის ჩვენების შესახებ, მოსამართლეთა კოლეგიამ არ დააკმაყოფილა.

დასკვნით სიტყვაში შანიძემ დეტალურად გაიხსენა 2014 წლის 4 მარტს, გეგუთის ციხის საკანში მომხდარი ჩხუბი,  რომლის შედეგადაც 24 წლის გიგა ფარტენაძე გონზე მოუსვლელად გარდაიცვალა.

მისი თქმით, საკანში დაპირისპირება ფარტენაძესა და ერთ–ერთ პატიმარს, ახლა უკვე საქმეზე მსჯავრდებულ გიორგი სეხნიაშვილს შორის სიტყვიერი შელაპარაკებით დაიწყო, რაც ფიზიკურ დაპირისპირებაში გადაიზარდა. ჩხუბის დროს ციხის ადმინისტრაციამ საკანში ე.წ. მაყურებლები გოჩა აბზიანიძე და ლაშა ჭკადუა შეუშვა,  რომლებმაც ფარტენაძეს  სასიკვდილოდ სცემეს. შანიძის თქმით, პატიმრის ცემაში მონაწილეობდნენ გიორგი სეხნიაშვილი და მესამე მსჯავრდებული, ლევან მოისწრაფიშილი. თავად კი ფარტენაძე არ უცემია.

მსჯავრდებულმა პროცესზე ციხეში არსებულ სისტემურ დანაშაულზეც ისაუბრა. მისი თქმით, გამოძიებამ ხელი დააფარა საქმეში მონაწილე სხვა დამნაშავე პირებს.  არ დასაჯა  არც ციხის ადმინისტრაცია, რომლებმაც ღამის საათებში საკანში, სადაც მკვლელობა მოხდა, ე.წ. მაყურებლები შეუშვა.

აღსანიშნავია, რომ გიგა ფარტენაძის ცემის საქმეზე დაკავებული არ არიან შანიძის მიერ ხსენებული გოჩა აბზიანიძე და ლაშა ჭკადუა. 

შოთა შანიძე ოთხი წელია სასჯელს სამარტოო საკანში იხდის. მისი თქმით, მან ბოლომდე ითანამშრომლა პროკურატურასთან, თუმცა, სანაცვლოდ ზეწოლა და დაშინება მიიღო. შანიძემ პროცესზე მის მიმართ ე.წ. კრიმინალური ავტორიტეტების სახელით ფსიქოლოგიურ ზეწოლაზე ისაუბრა. თქვა, რომ მის ოჯახს დაცვა მოუხსნეს და მისი ლიკვიდაციის საფრთხეც არსებობს.

შანიძემ მის მიერ პროცესზე მოყოლილ ფაქტებზე წერილობით პროკურატურასაც აცნობა, თუმცა, მისი ადვოკატის, გიორგი გოგინავას თქმით, ჯერჯერობით უწყებას ამაზე რეაგირება არ მოუხდენია.

გიგა ფარტენაძის საქმეზე მორიგი სასამართლო პროცესი თითქმის ოთხი საათი გაგრძელდა. მორიგ სხდომაზე დასკვნითი სიტყვით მსჯავრდებულ შანიძის ადვოკატი და საქმის პროკურორი, დავით ცირეკიძე წარსდგებიან. მოსამართლეთა კოლეგიამ განაჩენი,  შესაძლოა, მომდევნო სხდომაზე გამოაცხადოს.

24 წლის გიგა ფარტენაძე გეგუთის ცეხეში 2014 წლის 4 მარტს, ცემით მოკლეს. გამოძიების ინფორმაციით,  საკანში მყოფ მსჯავრდებულებს: შოთა შანიძეს, ლევან მოისწრაფიშვილს, გიორგი სეხნიაშვილსა და გიგა ფარტენაძეს შორის დაწყებული სიტყვიერი შელაპარაკება ფიზიკურ დაპირისპირებაში გადაიზარდა. შანიძემ, სეხნიაშვილმა და მოისწრაფიშვილმა გიგა ფარტენაძე იატაკზე წააქციეს, რა დროსაც მან გონება დაკარგა და წინააღმდეგობის გაწევა ვეღარ შეძლო. მიუხედავად ამისა, ისინი აგრძელებდნენ სასტიკ ძალადობას, კერძოდ, გულმკერდის, კისრისა და სახის არეში ხელებითა და ფეხებით სცემდნენ და თავს ბეტონის იატაკზე არტყმევინებდნენ.

ქუთაისის საქალაქო სასამართლომ შოთა შანიძეს 15, გიორგი სეხნიაშვილს 9 და ლევან მოისწრაფიშვილს 11 წლით თავისუფლების აღკვეთა მიუსაჯა.

Print E-mail
FaceBook Twitter
მსგავსი სიახლეები
დასავლეთ საქართველოსა და მათ შორის
იმერეთის რეგიონში 30-31 მარტის ჩათვლით წვიმაა ნავარუდევი.
10:24 / 30.03.2020
დასავლეთ საქართველოსა და მათ შორის იმერეთის რეგიონში 30-31 მარტის ჩათვლით წვიმაა ნავარუდევი.
17 დღიანი უწყვეტი ძებნის შემდეგ
მაშველებმა ქუთაისში  დაკარგული ტურისტის ცხედარი იპოვეს.
22:04 / 27.03.2020
17 დღიანი უწყვეტი ძებნის შემდეგ მაშველებმა ქუთაისში  დაკარგული ტურისტის ცხედარი იპოვეს.

მოცემული ვებ გვერდი „ჯუმლას" ძრავზე შექმნილი უნივერსალური კონტენტის მენეჯმენტის სისტემის (CMS) ნაწილია. ის USAID-ის მიერ დაფინანსებული პროგრამის "მედია გამჭვირვალე და ანგარიშვალდებული მმართველობისთვის" (M-TAG) მეშვეობით შეიქმნა, რომელსაც „კვლევისა და გაცვლების საერთაშორისო საბჭო" (IREX) ახორციელებს. ამ ვებ საიტზე გამოქვეყნებული კონტენტი მთლიანად ავტორების პასუხისმგებლობაა და ის არ გამოხატავს USAID-ისა და IREX-ის პოზიციას.
This web page is part of Joomla based universal CMS system, which was developed through the USAID funded Media for Transparent and Accountable Governance (MTAG) program, implemented by IREX. The content provided through this web-site is the sole responsibility of the authors and does not reflect the position of USAID or IREX.
ავტორის/ავტორების მიერ საინფორმაციო მასალაში გამოთქმული მოსაზრება შესაძლოა არ გამოხატავდეს "საქართველოს ღია საზოგადოების ფონდის" პოზიციას. შესაბამისად, ფონდი არ არის პასუხისმგებელი მასალის შინაარსზე.