ქუთაისიპოსტი

ქუთაისის საქალაქო სასამართლოში, მორაგბე მერაბ კვირიკაშვილის საქმეზე ავტოსაგზაო შემთხვევის თვითმხილველი და ის გამომძიებლები დაიკითხნენ, ვინც საქმეზე ოპერატიული მოქმედებები ჩაატარა.
მოწმის სახით დაკითხულმა კახი ნემსაძემ პირველად ისაუბრა თეთრ ავტომანქანაზე, რომელმაც მისი თქმით, კვირიკაშვილის ავტომანქანას საფრთხე შეუქმნა და მანევრირება აიძულა, რასაც საბოლოოდ შეჯახება მოჰყვა. კახი ნემსაძეს შემთხვევის დღეს დაკითხვის დროს ეს ინფორმაცია ჩვენებაში ნათქვამი არ აქვს.

კახი ნემსაძემ სასამართლოს უთხრა, რომ პირველი დაკითხვის დროს გამომძიებლებს მისთვის შემთხვევის ადგილზე სხვა ავტომანქანის არსებობის შესახებ არ უკითხავთ, გარდა ამისა, მან მიუთითა, რომ მომხდარის გამო აღელვებული იყო.

ნემსაძის შემდეგ პროკურატურამ მოწმის სახით ის გამომძიებლები გამოიძახა, რომლებმაც ავტოსაგზაო შემთხვევის დღეს მოწმე ნემსაძე დაკითხეს.

გამომძიებლებმა განაცხადეს, რომ ყველა ძირითადი შეკითხვა დასვეს, თუმცა, ყველა მათგანის ფიქსირება არ ხდება და ამის ვალდებულება არ აქვთ.

კახი ნემსაძის ჩვენების მიხედვით, მერაბ კვირიკაშვილი აღნიშნული მანქანის შეჯახების თავიდან არიდების გამო იძულებული იყო გზის მარჯვენა მხარეს გადასულიყო. პროკურტურა კი ამტკიცებს, რომ მერაბ კვირიკაშვილმა მანევრი არა საფრთხის არიდების, არამედ, გასწრების მიზნით გააკეთა.

კახი ნემსაძის მიერ მიცემულ ჩვენებაში ნახსენები ავტომანქანა იდენტიფიცირებული არ არის. დაცვის მხარის თქმით, ავტომანქანა შემთხვევის ადგილიდან მიიმალა.

2016 წლის ზაფხულში, ქუთაისის შემოვლით გზაზე მომხდარ ავტოსაგზაო შემთხვევას გიორგი პაპასკირი, მისი მეუღლე, მათი მეგობარი და  კვირიკაშვილის მეუღლე ემსხვერპლნენ. მერაბ კვირიკაშვილი აღნიშნულ საქმეში ბრალდებულია.


ამავე თემაზე:

ქუთაისი-სამტრედიის გზაზე ავარიის შედეგად დაღუპულები ახალგაზრდა ცოლ–ქმარი არიან

მერაბ კვირიკაშვილის მეუღლე გარდაიცვალა

ავტოსაგზაო შემთხვევის შედეგად დაშავებული რაგბისტების მდგომარეობა სტაბილურია

მერაბ კვირიკაშვილის საქმის არსებითი განხილვა გადაიდო

ავტოავარიაში დაღუპულის დედა მორაგბე მერაბ კვირიკაშვილის დასჯას ითხოვს