ქუთაისში ორ შენობას კულტურული მემკვიდრეობის ძეგლის სტატუსი მიენიჭა.

ობიექტების ძეგლთა სახელმწიფო რეესტრში ასახვის შესახებ შესაბამისი ბრძანება კულტურული მემკვიდრეობის დაცვის ეროვნული სააგენტოს გენერალურმა დირექტორმა, ნიკოლოზ ანთიძემ მიმდინარე წლის 3 იანვარს გამოსცა.

საუბარია,  ფალიაშვილისა და ჩეჩელაშვილის ქუჩაზე მდებარე ორ ნაგებობაზე, რომელთაგან ერთ-ერთი კერძო საკუთრებაა, ხოლო მეორე ადგილობრივი თვითმმართველობის ბალანსზეა. თუმცა, სტატუსის მინიჭების შესახებ ადგილობრივ ხელისუფლებაში ინფორმაცია არ აქვთ.

ჩეჩელაშვილის ქუჩის #24-ში მდებარე შენობა ამ დროისთვის ავარიულია. 2016 წლის სექტემბრამდე მასში #29-ე საბავშვო ბაღი ფუნქციონირებდა. ობიექტის ავარიულობის გამო, აღსაზრდელები სხვაგან გადაიყვანეს.


ჩეჩელაშვილის ქუჩაზე მდებარე საბავშვო ბაღის  ყოფილი შენობა

ავარიულ მდგომარეობაში მყოფ ობიექტს ექსპერტიზა ერთხელ უკვე ჩაუტარდა. ლევან სამხარაულის ეროვნული ექსპერტიზის ბიურომ მისი რეაბილიტაციის რეკომენდაცია მიზანშეწონილად არ მიიჩნია.

ააიპ ქუთაისის ბაგა-ბაღების გაერთიანებაში განმარტავენ, რომ შენობის ხელახალი ექსპერტიზისთვის სამხარაულის ბიუროს მიმდინარე წლის 9 იანვარს მიმართეს.

გაერთიანების ხელმძღვანელი, დავით წიტაიშვილი ამბობს, რომ ნაგებობისთვის მინიჭებული სტატუსის შესახებ ინფორმაციას არ ფლობს.

თუმცა, ქუთაისის მერიის პრესსამსახურში განმარტეს, რომ თვითმმართველობა საბავშვო ბაღის შენობის რეაბილიტაციისთვის კუტურული მემკვიდრეობის დაცვის ეროვნულ სააგენტოსთან თანამშრომლობისთვის მზადაა.

აღმოჩნდა, რომ ქუთაისის ადგილობრივი ხელისუფლებისგან განსხვავებით, საკუთარი შენობის ახალი სტატუსის შესახებ უკვე ინფორმირებულია ფალიაშვილის ქუჩა #11-ში მდებარე ობიექტის კერძო მესაკუთრე.

კულტურული მემკვიდრეობის დაცვის ეროვნული სააგენტოში გაგვიცხადეს, რომ მასთან შენობის რეაბილიტაციის პროექტზე კონსულტაციები მიმდინარეობს.

"რაც შეეხება,  ჩეჩელაშვილის ქუჩაზე მდებარე ობიექტს, სააგენტოსთან შეთანხმების გარეშე მისი რეაბილიტაცია დაუშვებელია," - განაცხადეს კულტურული მემკვიდრეობის დაცვის ეროვნული სააგენტოში.

თუ რატომ არ იყო ამ დრომდე ქუთაისში ფალიაშვილისა და ჩეჩელაშვილის ქუჩაზე მდებარე შენობები ძეგლთა სახელმწიფო რეესტრში, სააგენტოში აცხადებენ,
რომ ეს საკმაოდ ხანგრძლივ პროცედურებთანაა დაკავშირებული, რაც ადგილზე მოკვლევას, ობიექტების დასურათებას და ფაქტების გადამოწმებას გულისხმობს.

უწყებაში განმარტავენ, რომ ამა თუ იმ შენობაზე სტატუსის მინიჭება ეტაპობრივად ხდება.

კულტურული მემკვიდრეობის დაცვის ეროვნული სააგენტოს მონაცემებით, ქუთაისში ძეგლის სტატუსის მქონე სულ 252 შენობაა.