ქუთაისიპოსტი

ქუთაისის საკრებულოს ფრაქცია "ერთიანი ნაციონალური მოძრაობა" მიიჩნევს, რომ ქუთაისში პარკირების საფასური ქალაქის ეკონომიკურ მდგომარეობასთან შეუსაბამოა და მისი განახევრების ინიციატივით გამოდის.

"პარკირების საფასური არ არის ქუთაისის მოსახლეობის შემოსავლების და პარკირების ადგილების რაოდენობის ადეკვატური. სამწუხაროდ, "პარკინგსერვისი" გახდა ახლობლების და "ქართული ოცნების" აქტივისტების დასაქმების ადგილი, რომელთა ხელფასები და პრემიები ქუთაისელთა ჯიბიდან ამოღებული თანხით ფინანსდება. ფრაქცია "ნაციონალური მოძრაობა" გამოდის ინიციატივით, განახევრდეს პარკირების საფასური და დაიწყოს მუშაობა პარკირების ადგილების გაზრდის და ამ სფეროში არსებული პრობლემების გადაჭრის გეგმაზე", - აცხადებს საკრებულოს "ნაციონალი" დეპუტატი, გიგა შუშანია.

ფრაქციის წევრები მიიჩნევენ, რომ მერიის მიერ პარკირების მოსაწესრიგებლად შპს "პარკინგსერვისის" დაფუძნება არაგონივრული იყო და ჯობდა ეს ვალდებულება საკუთარ თავზე კერძო კომპანიას აეღო. არსებული რეალობით კი ქალაქმა "სითი პარკის" მსგავსი მოდელი.

შპს "პარკინგსერვისში" აცხადებენ, რომ ახლა მძღოლებს გაცილებით უფრო იაფის გადახდა უწევთ, ვიდრე, მაშინ, როცა ე.წ. სტაიანშიკების დროს იყო. გარდა ამისა, მათივე თქმით, ფასების რეგულირება ადგილობრივი თვითმმართველობის კომპეტენციაა და არა "პარკინგსერვისის".

"ეს ტარიფები დაადგინა ქუთაისის საკრებულომ და არა "პარკინგსერვისმა". ამასთანავე, ყველას ახსოვს  რა უჯდებოდა მძღოლებს ე.წ. სტაიანშიკებთან ურთიერთობა. თუ მაშინ 50 თეთრიდან 2 ლარამდე იხდიდნენ დღეში, ახლა,  მოქმედი ტარიფით რომ გამოვთვალოთ,  დღეში მხოლოდ 10 თეთრის გადახდა უწევთ",-ამბობენ შპს "პარკინგსერვისში".

ავტოსადგომზე მსუბუქი ავტომობისლისთვის 1 საათით გაჩერება 0.50; 3 საათი –1 ლარი; ყოველი შემდეგი საათი 0.50 ლარი ღირს. ერთი დღით პარკირების ღირებულება 2 ლარით განისაზღვრა, ერთი კვირით –7 ლარი, ერთ თვე– 10 ლარი, 182 დღე ანუ ნახევარი წელი –25 ლარი, ხოლო მთელი წლით ავტომობილის პარკინგი 40 ლარი ღირს.

განსხვავებული ტარიფები მოქმედებს კერძო ტაქსების მძღოლებისთვის. მათ 10 დღეში 10 ლარის გადახდა მოუწევთ, 20 დღე –20 ლარის და ასე შემდეგ.

სატვირთო ავტომობილებისა და სპეცტექნიკისთვის 1 დღე - 3 ლარი, 30 დღე – 30 ლარი, 1 წელი კი 250 ლარი ღირს. პარკირების საფასურის გადახდა მძღოლებს კომერციულ ბანკებსა და სწარფი გადახდის აპარატებით შეუძლიათ.

შპს "პარკინგსერვისმა", რომელიც ქუთაისის მერიამ 2015 წელს დააფუძნა, გასული წლის ბიუჯეტში იჯარის გეგმა ვერ შეასრულა. შპს-ს მიერ ბიუჯეტის წინაშე აღებული ვალდებულებების შეუსრულებლობაზე კვლევა არასამთავრობო  ორგანიზაცია "საერთაშორისო გამჭვირვალობა -საქართველომაც" ჩაატარა.