"ბავშვები, რომლებსაც ეზო არ გააჩნიათ" - რუბრიკაში "ჩემი ხმა თვითმმართველობას" (ვიდეო)
15:51 / 12.07.2017
"ქუთაისიპოსტი" აგრძელებს რუბრიკას - "ჩემი ხმა
თვითმმართველობას".
რუბრიკა მოიცავს როგორც ვიდეოგამოკითხვებს, ასევე, სადისკუსიო
შეხვედრებს.
რუბრიკის ფარგლებში თვეში 2 მოქალაქეს 2-2 წუთი თავიანთი პრობლემებისა
და მათთვის საინტერესო საკითხების გასაჟღერებლად დაეთმობა.
აღნიშნული ჩანაწერები ვიდეომასალის სახით ქუთაისიპოსტის ვებ-გვერდზე
განთავსდება, ხოლო გამოქვეყნების შემდეგ, ორ თვეში ერთხელ მოეწყობა
სადისკუსიო შეხვედრა მხარეების მონაწილეობით, სადაც ვიდეოჩანაწერების
ჩვენება მოხდება, რომლის შემდეგაც გაიმართება დისკუსია მოქალაქეების
მიერ დასმულ საკითხებზე.
რუბრიკის შემდეგი სტუმარია ქუთაისში რუსთაველის #95-ში მცხოვრები,
გულნარა კილაძე, რომელიც მისი კორპუსის წინ ოთხსართულიანი
მრავალფუნქციური შენობის მშენებლობის შეჩერებას ითხოვს. მისი თქმით,
ზემოთ აღნიშნული ობიექტის აშენების შემთხვევაში ბავშვებს სათამაშო
სივრცე აღარ დარჩებათ.
რუსთაველის #95-ში, სადაც ორი თვის წინ ნახევარსაუკუნოვანი ნაძვი
მოჭრეს, 4 სართულიანი შენობის მშენებლობა ჯერ არ დაწყებულა. შპს "ალფა
+"-ს, რომელსაც ეს ტერიტორია ეკუთვნის, ადგილიდან მოჭრილი ნაძვიც არ
გაუტანია.
გარდა ამისა, უყურადღებოდ მიტოვებული მშენებლობის ადგილი საპირფარეშოდ
და ნაგავსაყრელად არის გადაქცეული.
შპს "ალფა +"-ის ხელმძღვანელს, მამუკა ორმოცაძეს ამ თემაზე საუბარი არ
სურს.
რუსთაველის #95-ში არსებული სკვერის ჩრდილოეთი ნაწილი, შპს "ალფა +"-ს
ქუთაისის მერიამ 2015 წელს, 50 წლიანი იჯარით, აღნაგობის უფლებით,
მორიგების შედეგად გადასცა.
მასალის გამოყენების პირობები