ქუთაისში, მონ პლეზირის თაღის მიმდებარე ტერიტორიაზე "შემოდგომის ფესტივალი" გაიმართა.

ღონისძიებაზე წარმოდგენილი იყო ხალხური სანახაობები და ქალაქური რომანსები, თათარას მოდუღება და ჩურჩხელის ამოვლება, ღვინის დეგუსტაცია, ყვავილების გამოფენა-გაყიდვა, ხელნაკეთი აქსესუარების, თექისა და ბატიკის ნაკეთობათა გამოფენა-გაყიდვა.

"ქუთაისში პირველად ვცადეთ შემოდგომის დღესაწაული აღგვენიშნა და ეს სიმბოლურად, გიორგობას დავამთხვიეთ. აქ წარმოდგენილი ღონისძიებები ძირითადად მოსავლის აღებას, ხვავს, დოვლათს უკავშირდება," - განაცხადა ქუთაისის მერმა, შოთა მურღულიამ.

"შემოდგომის ფესტივალის" ჩასატარებლად ქალაქის მერიამ მიმდინარე წლის 13 ოქტომბერს 8 822 ლარიანი ელექტრონული ტენდერი გამოაცხადა. მასში გამარჯვებულად "ქუთაისის ახალგაზრდული ცენტრი" გამოვლინდა, რომელმაც ღონისძიების მოწყობაში 8 500 ლარი მოითხოვა.