ცენტრალური კრიმინალური პოლიციის იმერეთის სამმართველოს უფროსის, გიორგი კაჭარავას საქმეს, თბილისის პროკურატურა გამოიძიებს.

დაკავებულის ადვოკატის ინფორმაციით, მას მოდულის შენობაში გადაიყვანენ.

გიორგი კაჭარავასთვის ბრალი ჯერ არ წაუყენებიათ.

ის, იმერეთის კრიმინალური პოლიციის დეტექტივ-გამომძიებელთან ერთად, ქუთაისში 2016 წლის 14 სექტემბერს შსს-სა და სუს–ის ერთობლივი სპეცოპერაციის შედეგად დააკავეს.

შსს-ს ინფორმაციით, დაკავებულებმა ნარკოტიკული საშუალების შეძენა-შენახვის ფაქტზე დაკავებული ჯ.ჯ.-ს საქმეზე მოწმის სახით დაბარებულ ბ.უ.-ს, უსაფრთხოებისა და ხელშეუხებლობის გარანტიის სანაცვლოდ გარკვეული რაოდენობის თანხა გამოსძალეს.

გამოძიება საქართველოს სისხლის სამართლის კოდექსის 338-ე მუხლის მეორე ნაწილის "ბ" და "გ" ქვეპუნქტებითა და ამავე მუხლის მესამე ნაწილის "გ" ქვეპუნქტით მიმდინარეობს, რაც 11–დან 15 წლის ვადით თავისუფლების აღკვეთას ითვალისწინებს.