წყალტუბოს სოფელ ოფშკვითში, 17 წლის თორნიკე ბაღაშვილის განზრახ მკვლელობაში ბრალდებულის ადვოკატი, მისი დაცვის ქვეშ მყოფის მიმართ წაყენებული ბრალის გადაკვალიფიცირებას ითხოვს.
ი.ტ-ს, რომელმაც გამოძიების ინფორმაციით, ყოფილი თანაკლასელი გულის არეში დანის დარტყმით მოკლა, ბრალი 109 მუხლის მეორე ნაწილის  ბ  ქვეპუნქტით აქვს წაყენებული, რაც წინასწარი შეცნობით არასრულწლოვანის მკვლელობას გულისხმობს.

ბრალდებულის ადვოკატის, ირაკლი შენგელიას თქმით, ი.ტ.-ს, რომელმაც მოკლული შეხვედრაზე დაიბარა, მისი მოკვლა განზრახული არ ჰქონდა. მან არასრულწლოვანს სასიკვდილო ჭრილობა მას შემდეგ მიაყენა, რაც გარდაცვლილი ფიზიკურად გაუსწორდა.

"გამოკითხვაზე ჩემი დაცვის ქვეშ მყოფმა განაცხადა, რომ გარდაცვლილს დანა დაზიანების მიყენების მიზნით დაარტყა, თუმცა, ეს მას შემდეგ მოხდა, რაც მოკლულმა ცემა დაუწყო. ი.ტ.-ს თავიდანვე არ ჰქონდა მისი მოკვლა განზრახული. ამიტომ, მიგვაჩნია, რომ ბრალი უნდა გადაკვალიფიცირდეს და საქმე 108-ე მუხლით აღიძრას", - ამბობს ირაკლი შენგელია.

წყალტუბოს სოფელ ოფშკვითში, 2017 წლის 3 დეკემბერს მომხდარი არასრულწლოვანის მკვლელობის საქმეზე,  პირველი სასამართლო პროცესი  გასული წლის 5 დეკემბერს გაიმართა, სადაც  ბრალდებულს ორთვიანი წინასწარი პატიმრობა შეუფარდეს. სასამართლოში ბრალდებულმა თავი დამნაშავედ  ნაწილობრივ ცნო.  

,,ჩემი კლასელი იყო, მაგრამ არ ვიცოდი არასრულწლოვანი თუ იყო, ამიტომ თავს ნაწილობრივ ვთვლი დამნაშავედ", -  განცხადა სასამართლო  სხდომაზე ბარლდებულმა.

მორიგი პროცესი 22 თებერვალს ჩაინიშნა,  თუმცა, ბრალდებამ მოწმეების დაკითხვისა და ჩატარებული ექსპერტიზების შედეგების მისაღებად დრო ითხოვა და წინასასამართლო სხდომის დანიშვნა 27 მარტს მოითხოვა.

მოსამზადებელი სხდომის ახალი თარიღი საქმის მოსამართლემ უნდა ჩანიშნოს.

17 წლის თორნიკე ბაღაშვილს ყოფილმა თანაკლასელმა სასიკვდილო ჭრილობა გულის არეში დანით მიაყენა. მომხდარს წინ დაკარგული მობილური ტელეფონის გამო დაწყებული კონფლიქტი უძღოდა, რომელიც ბრალდებულისა და გარდაცვლილის საერთო ნაცნობ გოგონას ეკუთვნოდა.

დაკარგული ტელეფონის გამო, ი.ტ.-მ თორნიკე ბაღაშვილი  საქმის გასარჩევად სოფლის სასაფალაოსთან დაიბარა.  ურთიერთშელაპრაკების შემდეგ ი.ტ.-მ ყოფილ თანაკლასელს გულის არეში დანა დაარტყა. 17 წლის თორნიკე ბაღაშვილი საავადმყოფოში მიყვანამდე გარდაიცვალა. ი.ტ.-კი შემთხვევის ადგილიდან მიიმალა. 

ყოფილი  თანაკლასელის მკვლელობაში ბრალდებული ორი დღის შემდეგ,  თბილისში დააკავეს.  



ამავე თემაზე:


მობილურით გახსნილი მოზარდის მკვლელობის საქმე

წყალტუბოში მოკლული მოზარდის ახლობლები ბრალდებულის ოჯახის სოფლიდან გასახლებას ითხოვენ

ორთვიანი წინასწარი პატიმრობა არასრულწლოვანის მკვლელობაში ბრალდებულს

წყალტუბოში, მოზარდის მკვლელობის ბრალდებით ერთი პირი დააკავეს

წყალტუბოში მოზარდი მოკლეს

"თავს ნაწილობრივ ვთვლი დამნაშავედ" - სოფელ ოფშკვითში არასრულწლოვანის მკვლელობის საქმეში ბრალდებული

ოფშკვითში არასრულწლოვნის მკვლელობის საქმეზე სასამართლოში პროცესი მიმდინარეობს