კელი დეგნანმა, „ქუთაისიპოსტის“ ოფისში სტუმრობისას, საქართველოდან მოქალაქეების მასიური გადინების შესახებ ჩვენი ჟურნალისტის დასმულ შეკითხვას უპასუხა.
საქართველოში აშშ-ის ელჩმა მოქალაქეებს მოუწოდა, რომ ამერიკაში წასასვლელად ლეგალურ გზას მიმართონ და არ ჩაიგდონ თავი საფრთხეში.

„უმორჩილესად გთხოვთ, ნუ ეცდებით ამერიკაში მოხვედრას არალეგალური გზით, ეს არის ძალიან საშიში და ამავდროულად არაკანონიერი. ამასთანავე, გართმევთ შანს, მეორედ ჩამობრძანდეთ ამერიკაში უკვე ლეგალურად. როდესაც ასეთი გზით შედიხართ ამერიკის შეერთებულ შტატებში, ითვლება რომ იქ იმყოფებით არალეგალურად და ხშირ შემთხვევაში ხდება ამ ადამიანების დეპორტაცია. ვწუხვართ, რომ საქართველოს მოსახლეობას ხშირად არასწორი ინფორმაცია მიეწოდება“- განაცხადა დეგნანმა.

რას უკავშირდება მოქალაქეების მიერ ქვეყნის დატოვება, ეკონომიკური ინდექსის გაუარესებას (რაზეც ხელისუფლებას განსხვავებული მოსაზრება აქვს), თუ პანდემიის პერიოდში საკონსულოში მიღების შეზღუდვას, ამ საკითხთან დაკავშირებით ელჩის მოსაზრება ასეთია.

„პანდემიის გამო ვიზის გაცემა გარკვეული პერიოდი შეფერხებული იყო და ბევრი საქმე დაგროვდა ამ კუთხით. ეს არა მარტო საკონსულოში, არამედ მსოფლიოს მაშტაბითაა. ჩვენ მაქსიმალურად ვცდილობთ, რომ სტუდენტებს, ვიზიტორებს, ბიზნესის წარმომადგენლებს ჰქონდეთ შესაძლებლობა, აიღონ ვიზა და გაემგზავრნონ. უბრალოდ ამისათვის მნიშვნელოვანია თადარიგის დაჭერა და უფრო ადრე საბუთების შემოტანა. ვიზის გაცემის პროცესი მიმდინარეობს. კიდევ ერთხელ აღვნიშნავ, რომ კოვიდის პერიოდმა გარკვეული შეზღუდვები მოგვიტანა და სწორედ ამან გამოიწვია ინტერვიუების შეფერხება ,თუმცა ყველაფერი კეთდება იმისთვის, რომ სიტუაცია გამოსწორდეს. მე ვურჩევ ყველას, ვისაც სურს ამერიკაში მოხვედრა, რომ ყველაფერი გააკეთონ კანონიერი გზით”- განაცხადა კელი დეგნანმა „ქუთაისიპოსტთან“ ინტერვიუში.

ელჩი იმერეთში საქართველო-ამერიკის შეერთებული შტატების დიპლომატიური ურთიერთობების 30 წლის იუბილეს ფარგლებში იმყოფებოდა. ამავე ვიზიტის პერიოდში, დეგნანი „ქუთაისიპოსტსაც“ ეწვია. ის მედიაორგანიზაციის ოფისში "ქუთაისიპოსტის" საქმიანობას გაეცნო. ასევე, ჩვენი სააგენტოს სტუდიაში ჩაწერილ ინტერვიუში ქვეყანაში მიმდინარე მნიშვნელოვან საკითხებზე ისაუბრა. გადაცემის ჩანაწერი "ქუთაისიპოსტის" ვებ-გვერდზე (www. Kutaisipost.ge) უახლოეს პერიოდში განთავსდება.

ავტორი: ქეთი გელაშვილი