პოლიტიკა
"ჩვენი მხრიდან პროვოკაციას ადგილი არ ექნება" - ოპოზიცია დღეს ქუთაისში აქცია-მსვლელობისთვის ემზადება
FaceBook

6 დეკემბერს, გერთიანებული ოპოზიცია ქუთაისში აქცია-მსვლელობას გამართავს. 



მსვლელობა 14:00 საათზე კიკვიძის ძეგლიდან დაიწყება და მერიის ადმინისტრაციულ შენობასთან დამთავრდება. გაერთიანებულ ოპოზიციაში 18 პარტია შედის. მათი მოთხოვნა პროპორციული არჩევნების ჩატარება იქნება.

აქცია-მსვლელობაში სტუდენტებიც მიიღებენ მონაწილეობას. მათ, ასევე, შეუერთდებიან მოძრაობა “დატოვე პარლამენტი ქუთაისში” .

აქციის ორგანიზატორები აცხადებენ, რომ მსვლელობა მშვიდობიანი იქნება.

"გავივლით "ქართული ოცნების" ოფისთან".   ჩვენი მხრიდან პროვოკაციას ადგილი არ ექნება. ვაჩვენებთ ხელისუფლებას როგორ უნდა მშვიდობიანი აქციის ჩატარება," - აცხადებს "ნაციონალური მოძრაობის" ერთ-ერთი ლიდერი გიგა შუშანია.

"დილიდან მზადებაში ვართ. პროპორციულ არჩევნებს ითხოვს ხალხი და ჩვენც ვუერთდებით ამ მთავარ მოთხოვნას. კონტრაქციას რაც შეეხება, იმედი მაქვს იმდენი გონიერება ეყოფა ხელისუფლებას, რომ ისევ დაპირისპირება და ისევ კვერცხების სროლა არ ატეხოს ამ ქალაქში, რადგან ამ ქალაქს არ ეკდარება," - ამბობს "ნაციონალური მოძრაობის" წევრი ირაკლი გვალია.

ქუთაისში, ბოლო ორი კვირაა დაძაბული პოლიტიკური ვითარებაა. მას შემდეგ, რაც ოპოზიციური პარტიების წარმომადგენლებმა სამოქალაქო აქტივისტებთან ერთად „დაბოქლომების აქცია“ დაიწყეს, როგორც „ქართული ოცნების“, ასევე, პოლიტიკური პარტიების ოფისებთან ფიზიკური დაპირისპირება რამდენჯერმე მოხდა.


29 ნოემბერს მმართველი პარტიის ოფისის დაბოქლომების შემდეგ, რა დროსაც შენობის მინა ჩაიმსხვრა, „ქართული ოცნების“ აქტივისტებმა, ქუთაისის მერიის საჯარო მოხელეებთან და საკრებულოს დეპუტატებთან ერთად, „ნაციონალური მოძრაობის“ ოფისზე ორგანიზებული თავდასხმა მოაწყვეს. მათ შენობას ცოცხები და კვერცხები დაუშინეს და პარტიის ოფისში შეჭრა სცადეს.
იგივე განმეორდა პირველ დეკემბერს, რა დროსაც აქციის მონაწილეებმა, ცოცხები, კვერცხები და წითელი საღებავი „ნაციონალური მოძრაობის“ ოფისთან ერთად „გაერთიანებული ოპოზიციის“ ადგილობრივ ორგანიზაციასაც ესროლეს.





Print