ქუთაისის საკრებულოს წევრი და ნიკეას ოლქის მაჟორიტარი დეპუტატი, ირმა პეტრიაშვილი სოციალურად დაუცველი ოჯახებისთვის დახმარების მოხსნის მიზეზების შემსწავლელი კომისიის შექმნას მოითხოვს.
დეპუტატი აცხადებს, რომ მის სამჟორიტარო ოლქში მცხოვრებ 22 სოციალურად დაუცველ ოჯახს ერთჯერადი მატერიალური
დახმარება უსამართლოდ მოუხსნეს.
"არჩევნებამდე კარდაკარ მიწევდა სიარული და სათითაოდ მაქვს ეს ოჯახები შესწავლილი, ვისაც სოციალური დახმარება მოუხსნეს. რის მიზეზიც თითქოსდა სოციალური პირობების გაუმჯობესება გახდა," – აცხადებს ირმა პეტრიაშვილი.
საკრებულოს დეპუტატი მიიჩნევს, რომ კომისიის მიერ შესწავლილი უნდა იქნეს მიზეზები, რამდენად სამართლიანად მოეხსნათ ამ ოჯახების დახმარება, ხოლო მონაცემები შესაბამისი წინადადებებითა და რეკომენდაციებით გადაგზავნილი იქნეს ჯანდაცვის სამინისტროში.
"რა თქმა უნდა ჩვენ გადაწყვეტილებას ვერ მივიღებთ, მაგრამ ეს კომისია დაეხმარება მათ სამართლიანად მიიღონ გადაწყევტილება," – აღნიშნა ირმა პეტრიაშვილმა.
ნიკეას მაჟორიტარი დეპუტატი აცხადებს, რომ მის მიერ გაჟღერებული იდეა საკრებულოში მიღებული იქნება.

დეა მანაგაძე