გაერთიანებული ოპოზიცია " ძალა ერთობაშიას" ქუთაისის ორგანიზაციის წარმომადგენლები მერიაში მიმდინარე რეორგანიზაციას აკრიტიკებენ.
"ჩატარებული რეორგანიზაცია მიზნად ისახავდა არა მერიის მენეჯმენტის გაუმჯობესებას და პრობლემების მოგვარებას, არამედ პოლიტიკური და ვიწრო პარტიული ამოცანების გადაჭრას, რაც დადასტურდა ქუთაისის მერის მიერ საკრებულოში წარმოდგენილი ახალი სტრუქტურით.  იქმნება ერთი ახალი სამსახური და  ერთი ახალი აიპი, ასევე სხვადასხვა სამსახურებში გაზრდილია შტატების რაოდენობა. რეორგანიზაციის შედეგად ქუთაისი მიიღებს გაზრდილ ბიუროკრატიას, დასაქმებული პარტიული აქტივისტებისა და ახლობლების გაზრდილ რაოდენობას და ბიუჯეტიდან მათ შენახვაზე გაწეული ხარჯების ზრდას. ხოლო ქალაქის წინაშე არსებული პრობლემები ისევ უცვლელი დარჩება.


რეორგანიზაციის შედეგად კიდევ უფრო იზრდება დასაქმებულთა რაოდენობა, ასევე იქმნება ახალი აიპი, რაც "ქართული ოცნების" დანერგილი ტრადიციის შესაბამისად ავტომატურად ნიშნავს პარტიული აქტივისათვის დასაქმების ბიუროს ფუნქციის შესრულებას. ქუთაისის მერმა კულტურის სამსახურის გაუქმების შემდეგ, ეხლა უკვე გადაწყვიტა მერიის აპარატის შემადგენლობაში არსებული კულტურის განყოფილების გაუქმება, რითაც დაადასტურა, რომ მისთვის კულტურა პრიორიტეტი არ არის და მხოლოდ თეატრალური მერის და მსგავსი ტიტულების მიღებაზეა ორიენტირებული.

ასევე გაურკვეველია აუდიტის განყოფილების ნაცვლად აუდიტის სამსახურის შექმნა, როდესაც საზოგადოებას არ უნახავს განყოფილების მიერ მომზადებული არცერთი დასკვნა ჩავარდნილ პროექტებთან და მუშაობის პროცესში გამოვლენილი დარღვევების შესახებ. უფრო მეტიც განყოფილებამ საზოგადოებას თავი მისი ხელმძღვანელის ირგვლივ განვითარებული სკანდალით დაამახსოვრა თავი", - აცხადებს "გაერთიანებული ოპოზიციის" ქუთაისის ორგანიზაციის ლიდერი გიგა შუაშანია. 

ქუთაისის მერიაში რეორგანიზაცია გასულ წელს დაიწყო, რომელიც 28 თებერვალს უნდა დასრულდეს. 


ავტორი: ლილე ბერაძე