საქართველოდან უცხოეთში მოგზაურობის მსურველთა რაოდენობა მნიშვნელოვნად გაზრდილია. ამის შესახებ ტურისტული კომპანიის „კლარკ & რობინსონს“ აღმასრულებელმა დირექტორმა მამუკა კელაურაძემ „ბიზნესპრესნიუსთან“ საუბრისას განაცხადა.

მისი თქმით, საქართველოდან სამოგზაუროდ არა მხოლოდ ქართველები, არამედ არარეზიდენტებიც დადიან. ძირითადად კი, ისინი უკრაინის, ბელარუსისა და რუსეთის მოქალაქეები არიან.

როგორც მამუკა კელაურაძე აღნიშნავს, წელს, ტრადიციულად ყველაზე მოთხოვნადი თურქეთი იყო, რომელსაც კვიპროსი და საბერძნეთი მოსდევს. ახალ მიმართულებებს შორის კი, პორტუგალიის მიმართ გამორჩეულად დიდი ინტერესი დაფიქსირდა.

„მოთხოვნა ძალიან გაზრდილია. სამწუხაროდ, ციფრებში ზუსტად თქმა ჯერ არ შემიძლია, თუმცა, ზრდა დაფიქსირდა როგორც საქართველოს მოქალაქეების ხარჯზე, ისე ის მოქალაქეების, ვინც ჩამოსული იყო ჩვენთან და შემდეგ წავიდნენ მოგზაურობაში. ძირითადად ეს არის უკრაინა, ბელარუსი, რუსეთი. რაც ყველაზე საყურადღებო და სასიხარულოა, საქართველოს მოქალაქეები ძალიან აქტიურად მოგზაურობენ სხვა ქვეყნებში.

წელს ყველაზე მოთხოვნადი ტრადიციულად თურქეთი იყო (ივნისი, აგვისტო, სექტემბერი), შემდეგია კვიპროსი, რომელიც წელს ძალიან აქტუალური იყო, ეს ალბათ იმან განაპირობა, რომ ქუთაისიდან არის პირდაპირი ფრენები და წელს თბილისიდანაც დაემატა. ასევე მოთხოვნადი იყო საბერძნეთი, მიუხედავად იმისა, რომ ჩარტერული რეისები აღარ არის, მაგრამ არის რეგულარული რეისები, შესაბამისად, ბევრი ქართველი საბერძნეთშიც მოგზაურობდა.

ასევე დიდი ინტერესი იყო ევროპის მიმართულებით. იტალია, ესპანეთი, საფრანგეთი, პორტუგალია. პორტუგალია ახლა ძალიან აქტუალურია და დიდ ინტერესს იწვევს. გასაკვირი არც არის, იმიტომ, რომ რაც ახლოს იყო, იტალია, საფრანგეთი, ესპანეთი, ამ მიმართულებით „ვიზეარის“ რეისები უკვე დიდი ხანია არსებობს და მარტივად მოსახვედრი ადგილებია, შესაბამისად ქართველებმა კარგად აითვისეს უკვე. ახლა ახალ ადგილებზეა აქცენტი და მათ შორის პორტუგალია ერთ-ერთი პირველია.

არის ევროპაში სხვა ქვეყნებიც, სადაც ხალხი უფრო სანახაობრივი თვალსაზრისით დადის და არა დასასვენებლად. მაგალითად, ჩეხეთი ავსტრია, უნგრეთი, ბალკანეთის მხარესაც იყო საკმაოდ დიდი დაინტერესება, თუმცა ადრიატიკის მხარეს - ხორვატია, მონტენეგრო. თუმცა, ეს ცოტა რთული იყო, რადგან პირდაპირ ფრენები არ არის, ერთ გადაჯდომა კი ძალიან ძვირი და იშვიათია.

აღსანიშნავია ისიც, რომ წელს ავიაბილეთების ფასები შენარჩუნებულია მაღალ ნიშნულზე. თუმცა, გასაკვირი არაფერია, რადგან მოთხოვნა დიდია, მიწოდება ნაკლები. ამას ემატება ის, რომ პოსტ პანდემიური პერიოდია და ავიაკომპანიებმა ძალიან დიდი ზარალი განიცადეს კოვიდის დროს, ეს ზარალი ბუნებრივია, ასანაზღაურებელია. როდესაც ხედავ, რომ მოთხოვნა არის და იყიდება ძვირი ბილეთები, ბუნებრივია, არავინ აიღებს თავის თავზე, რომ გააიაფოს“,- განაცხადა მამუკა კელაურაძემ.

bpn.ge