გამოცდების ეროვნული ცენტრი 2023 წლის გამოცდების შესახებ ყველაზე ხშირად დასმულ კითხვებს პასუხობს.

ცენტრის ინფორმაციით, გამოცდებისთვის რეგისტრაცია 3 აპრილს, 18:00 საათზე სრულდება. ამის შემდეგ გამოცდებში მონაწილეობის მსურველი ვეღარ დარეგისტრირდება.

ამ თარიღის შემდეგ აბიტურიენტებს 13 აპრილის 18:00 საათამდე მხოლოდ საგნის შეცვლა ან დამატება, ასევე გამოცდის ენის შეცვლა შეეძლებათ; პროგრამების წაშლის, არჩევისა და შეცვლის საშუალება აბიტურიენტებს კიდევ რამდენიმე თვის განმავლობაში აქვთ. ეს პროცესი აპელაციის შედეგების გამოქვეყნების მომდევნო დღის 18:00 საათზე შეწყდება (კონკრეტული თარიღი გამოქვეყნდება).

ამასთან, ერთიან ეროვნულ გამოცდებში მონაწილეობის საფასური (ერთი გამოცდისათვის) 10 ლარია. ამავე თანხას იხდის სტუდენტთა საგრანტო კონკურსში მონაწილეც. პრაქტიკოსი მასწავლებლებისათვის დარეგისტრირება უფასოა, ხოლო მაგისტრანტობის კანდიდატებისა და მასწავლებლობის მსურველი პირებისათვის რეგისტრაციის საფასური 50 ლარია.

„რეგისტრაციის დასრულებისას თუ თქვენ მიიღეთ სისტემაში შესასვლელი ხუთნიშნა კოდი, რეგისტრაცია წარმატებით გაქვთ გავლილი. არ გაანდოთ სხვას კოდი, მხოლოდ თქვენ ხართ პასუხისმგებელი სარეგისტრაციო გვერდზე შეტანილ ცვლილებებზე“, - აცხადებენ გამოცდების ეროვნულ ცენტრში.

მათივე ინფორმაციით, ცენტრის ვებგვერდზე უკვე გამოქვეყნებულია ელექტრონული კრებული „ცნობარი აბიტურიენტებისათვის", სადაც მოცემულია ყველა უმაღლესი სასწავლებელი და ასევე ყველა ის საგანმანათლებლო პროგრამა, რომლებზეც მიმდინარეობს მიღება მიმდინარე სასწავლო წელს. ცნობარში იხილავთ დეტალურ ინფორმაციას საგანმანათლებლო პროგრამების, საგამოცდო პროცესის, შედეგების გამოქვეყნების, აპელაციის პროცედურის, ჩარიცხვისა და სახელმწიფო სასწავლო გრანტის მოპოვების წესის შესახებ.

შემოქმედებით ტურს ირჩევთ რეგისტრაციის დროს თანხის გადახდის გარეშე. დამატებითი ინფორმაციის მისაღებად კი უნდა მიმართოთ შესაბამისი უმაღლესი სასწავლო დაწესებულების ადმინისტრაციას.

ამასთან, სპეციალური პირობის მონიშვნა და შემდგომ ფორმა N100 -ის წარმოდგენა 13 აპრილის 18:00 საათამდე ევალებათ იმ პირებს, რომლებიც საჭიროებენ გამოცდების დროს სპეციფიკური გარემოს შექმნას. მხედველობის სათვალის გამო სპეციალური პირობის მონიშვნა საჭირო არ არის. ასევე მნიშვნელოვანია, რომ ჩარიცხვის მომენტში პროგრამა იყოს აკრედიტებული, რადგან სხვა შემთხვევაში გრანტს ვერ მიიღებთ.

„ცნობარში მითითებული ინფორმაცია განახლებადია და გარკვეული პერიოდულობით შეგიძლიათ გადაამოწმოთ აკრედიტაციის გახანგრძლივების ვადები ცენტრის ვებგვერდზე“,- აღნიშნულია საგამოცდო ცენტრის ინფორმაციაში.