საუბარია, ქალაქის ცენტრში 16 კვ.მ ფართი მიწის ნაკვეთზე. 

ქუთაისის საკრებულოს რიგგარეშე სხდომამ, ქალაქში ცენტრში სადავო კიბის უჯრედისთვის მიწის ნაკვეთის იჯარით გაცემის საკითხის განხილვის გარეშე ჩაიარა.

დღის წესრიგში, სადაც ექვსი საკითხი იყო შესული, ეს თემა საერთოდ არ მოხვდა. საკანონმდებლო ორგანოში ერთი კვირის წინ კი განმარტავდნენ, რომ 5 წლის ვადით თვითმმართველობის ქონების გასხვისებაზე, საკრებულოს უახლოეს სხდომაზე იმსჯელებდნენ.

საკრებულოს თავმჯდომარის მოვალეობის შემსრულებლის, ბექა ყანჩელის განმარტებით, საკითხის განხილვა საკრებულოს რიგით სხდომაზე მას შემდეგ მოხდება, რაც ის შესაბამისი კომისიის მიერ იქნება განხილული.

ქალაქის ცენტრში ე.წ. ბავშვთა სამყაროს მიმდებარე ტერიტორიაზე (ფალიაშვილის #2, #27ა ) ლონდა ზიბზიბაძისთვის 16 კვ.მ მიწის ნაკვეთის იჯარით გადაცემა საკრებულოს კომისიის სხდომაზე სადავაო  გახდა, რის გამოც საკითხი მიმდინარე წლის 24 მაისს ჩანიშნულ საკრებულოს სხდომის დღის წესრიგიდან ამოიღეს.

პარალელურად,  საკანონმდებლო ორგანოს ოპოზიციონერმა დეპუტატმა, დავით წიტაიშვილმა თემის  შესწავლა მოითხოვა. 

სადაო ფართი ე.წ "ბავშვთა სამყაროს"  მიმდებარე ტერიტორიაზეა, სადაც ამ დროისთვის მრავალფუნქციური ცენტრის მშენებლობა მიმდინარეობს. ობიექტის მეპატრონე კი ლონდა ზიბზიბაძე გახლავთ.

ხუთსართულიანი კომპლექსის მშენებლობას დაწყების დღიდან აპროტესტებს ადგილობრივი მოსახლეობა, რომელსაც მესაკუთრის წინააღმდეგ სასამართლოში სარჩელი აქვს შეტანილი.