ადამიანის უფლებების სწავლებისა და მონიტორინგის ცენტრი (EMC) ეხმიანება საზოგადოებრივ მაუწყებელში მიმდინარე მოვლენებს და საზოგადოებრივი მაუწყებლის სამეურვეო საბჭოს მოუწოდებს შეაჩეროს ახალი დირექტორის მიერ წარმოდგენილი რეფორმის იდეა, რომელიც რადიკალურად ეწინააღმდეგება საზოგადოებრივი მაუწყებლის კონცეფციასა და კანონით გათვალისწინებულ მოთხოვნებს.

"საზოგადოებრივი მაუწყებელი საჯარო მიზნებისა და ინტერესებისთვის შექმნილი, საზოგადოების მიერ დაფინანსებული და მის წინაშე ანგარიშვალდებული მაუწყებელია, რომელიც თავისუფალი უნდა იყოს კომერციული და პარტიულ-პოლიტიკური ჯგუფების გავლენებისგან და საზოგადოების ინფორმირებას, პოლიტიკური ცნობიერების ჩამოყალიბებას, სხვადასხვა ჯგუფების უკმაყოფილებების, მოთხოვნებისა და საჭიროებების რეპრეზენტაციას უნდა უწყობდეს ხელს. მისი საქმიანობა პლურალიზმის, პროგრამული მრავალფეროვნების, სარედაქციო დამოუკიდებლობის, სათანადო, ანგარიშვალდებული და გამჭვირვალე დაფინანსების პრინციპებს უნდა ეფუძნებოდეს.

ფინანსური და პარტიული ინტერესებისგან თავისუფალი მედია და სოციალური სივრცე საზოგადოების ნამდვილ მოთხოვნებს და დღის წესრიგებს უნდა ასახავდეს და კრიტიკული საზოგადოებრივ-პოლიტიკური გადაცემებით ხელისუფლებისა და სხვა ძალაუფლებრივი სუბიექტების ანგარიშვალდებულებას უნდა უწყობდეს ხელს. საზოგადოებრივ მაუწყებლებს განსაკუთრებული როლი აქვთ გამოხატვის თავისუფლების დაცვის კონტექსტში და მათი, როგორც პლურალისტული კომუნიკაციისა და სოციალური ერთობის მატარებელი სივრცის როლი, განსაკუთრებით მნიშვნელოვანია დემოკრატიულ საზოგადოებაში.[4]

EMC მიიჩნევს, რომ საზოგადოებრივ მაუწყებელში დღეს მიმდინარე მოვლენები არსებითად აზიანებს საზოგადოებრივი მაუწყებლის იდეას და მედია სივრცის ჩაკეტვისა და მასზე პოლიტიკური კონტროლის გაძლიერების რისკებს ქმნის. საზოგადოებრივი მაუწყებლის დირექტორის პოზიციაზე ვასილ მაღლაფერიძის არჩევა, რომელიც 2014-2016 წლებში მმართველი პოლიტიკური გუნდის ხელმძღვანელობასთან დაკავშირებული შპს „ჯი-დი-ეს“-ისთვის გენერალური პროდიუსერი იყო, საზოგადოებრივი მაუწყებელზე ხელისუფლების გავლენების გაძლიერების თაობაზე ეჭვებს იმთავითვე აჩენდა.

ნაჩქარევად, სათანადო კვლევისა და საჯარო დისკუსიების გარეშე, ახლადარჩეული დირექტორის მიერ საზოგადოებრივი მაუწყებლის რეფორმის გეგმა, რომელიც მაუწყებლის საქმიანობის ფაქტობრივ შეჩერებას ყველაზე კრიტიკულ პოლიტიკურ კონტექსში (მათ შორის, მოსალოდნელი არჩევნების, საკონსტიტუციო ცვლილებების, სოციალური კრიზისების ფონზე), ითვალისწინებს, არსებულ ეჭვებს კიდევ უფრო მეტად აძლიერებს. ზოგადად ბოლო პერიოდში მედიაში მიმდინარე პროცესების შუქზე (მათ შორის, დიდი ტელევიზიების- იმედის, მაესტროსა და GDS) ერთ მედია ჰოლდინგში გაერთიანება[5], რუსთავი 2-ის ირგვლივ მიმდინარე პროცესები მედია პლურალიზმსა და გამოხატვის თავისუფლებას მნიშვნელოვნად აზიანებს და პოლიტიკური ძალაუფლების კონცენტრაციის ტენდეციაზე უთითებს", - აღნიშნული ორგანიზაციის მიერ გავრცელებულ განცხადებაში.