"რუსეთი დაუბრუნდა იმ პოზას, რაც "ცივი ომის" დროს ჰქონდა. ნატოც უნდა დაუბრუნდეს იგივეს".

"საქართველო და ნატო ივლისის სამიტის კონტექსტში" ჰაინრიჰ ბიოლის ფონდის, სამხრეთ კავკასიის რეგიონული ბიუროს საჯარო დისკუსიის თემა გახდა. შეხვედრა ქუთაისში, დემოკრატიული ჩართულობის ცენტრში გაიმართა.

მომხსენებლები ნატოსა და ევროკავშირთან აღმოსავლეთ პარტნიორობის კოორდინატორი, ნინო თვალთვაძის, საქართველოს პოლიტიკის ინსტიტუტის დირექტორი, კორნელი კაკაჩია და ილიას სახელმწიფო უნივერსიტეტის უმცროსი მკვლევარი, გიორგი ცხადაია გახლდნენ. მათი თქმით,
2016 წლის ვარშავის სამიტი, ნატოს ისტორიაში, "ცივი ომის" შემდეგ, ერთ-ერთ ყველაზე მნიშვნელოვან სამიტად შეფასდა.

ანალოგოური კვალიფიკაცია მიეცა 2014 წლის უელსის სამიტსაც, რადგან იგი დაემთხვა უკრაინის მოვლენებს და ისლამური სახელმწიფოს გამოჩენას.
თუმცა, როგორც შეხვედრაზე ითქვა, უელსის სამიტზე ბოლომდე ვერ გაიაზრეს თუ რასთან ჰქონდათ საქმე, რადგან მოვლენები ელვის სისწრაფით განვითარდა, ამიტომ მიღებული გადაწყვეტილებები არასწორი იყო.

მომხსენებლების აზრით, ახლანდელი სამიტი ორ კვირაში გააგრძელებს და დააზუსტებს უელსის სამიტზე დაწყებულ საუბარს.

"რუსეთმა ცივი ომის შემდეგ, საქართველოს თუ არ ჩავთვლით, პირველად გამოაჩინა სისტემური დამოკიდებულება დასავლეთის მიმართ. დასავლეთისთვის ნათელი გახდა, რომ 2008 წლის ომი საქართველოსთან იყო არა ერთი ეპიზოდი, არამედ იმ სისტემური დამოკიდებულების შედეგი, რაც რუსეთს ჰქონდა დასავლეთის მიმართ. რუსეთი და დასავლეთი არიან ანტაგონისტები და ერთი გზით ვერ ივლიან. რუსეთი დაუბრუნდა იმ პოზას, რაც "ცივი ომის" დროს ჰქონდა. ნატოც უნდა დაუბრუნდეს იგივეს", - აღნიშნა გიორგი ცხადაძემ.

მომხსენებლების განმარტებით, ნატო არის ალიანსი, რომელიც "ცივი ომის" შემდეგ დაკავებული იყო კრიზისების მენეჯმენტით, კოლექტიური უსაფრთხოებითა და კოლექტიური თავდაცვით. 2014 წლის შემდეგ ნატომ თავდაცვის პრიორიტეტები გააძლიერა.

"ჩვენთვის ეს ნიშნავს იმას, რომ რასაც ამდენი ხანი ვამტკიცებდით და დასავლეთი ამას სერიოზულად არ აღიქვამდა, ფაქტებით დადასტურდა. რუსეთი არის რევანშისტულად განწყობილი იმპერია, რომელიც ადრე თუ გვიან მიუტრიალდება ნატოს და გაგრძელდება დაპირისპირება, რაც "ცივი ომის" დროს იყო. ობამას გადატვირთვის პოლიტიკამ არ გაამართლა, რადგან რუსეთის ელიტას აქვს ჩადებული იმპერიის აღდგენის კოდი და ამაზე უარს არ იტყვიან", - აღნიშნა ცხადაიამ.

შეხვედრაზე ითქვა, რომ რუსეთმა გამოავლინა თავისი სახე, რაც კარგია. შეიძლება ამან გააჭიანუროს საქართველოს ნატოში მიღების პროცესია, მაგრამ დღეს არავის ეპარება ეჭვი, რომ რუსეთის შეკავება აუცილებელია.