გამოვლენილი შემთხვევებიდან 50%-ზე გაფრთხილება, ხოლო ამდენივეზე დაჯარიმების ოქმი დაიწერა.

იმერეთის რეგიონში მიმდინარე წელს ნარჩენების ღია წესით დაწვის 18 შემთხვევა დაფიქსირდა. ეს კი გასული წლის მონცემებზე 15-ით ნაკლებია.

საუბარია ფოთლების, ბაღის/პარკის და საყოფაცხოვრებო ნარჩენების დაწვაზე.

"ნარჩენების მართვის კოდექსის" მიხედვით, მათი არადანიშნულების ადგილებში ღის წესით დაწვა 200 ლარიან ჯარიმას ითვალისწინებს. სამაგიეროდ, 500 ლარის ოდენობის ჯარიმა არის განსაზღვრული რეზინის, საბურავის და სხვა ელასტომერული მასალის დაწვაზე.

თუმცა, გარემოს დაცვის სამინიტროს საზოგადოებასთან ურთიერთობის სამსახურში განმარტავენ, რომ პირველ ეტაპზე მოქალაქეთა დაჯარიმებას ერიდებიან და მხოლოდ გაფრთხილებით შემოიფარგლებიან. უწყებაში ამბობენ, რომ თუკი ნარჩენების ღია წესით დაწვის ფაქტი ერთი და იმავე პირის მიერ მოხდა, ასეთ შემთხვევაში მას განსაზღვრული სანქცია დეკისრება.

"ვადგენთ ადმინისტრაციულ ოქმს. ეს ჩვეულებრივად სასამართლოს გადაეცემა, ის განიხილვას და იღებს შესაბამის გადაწყვეტილებას დააკისროს თუ არა ადმინისტრაციული სახდელი," - განმარტავს გარემოს ზედამხედველობითი დეპარტამენტის დასავლეთ ცენტრალურ სამმართველოს ინსპექტირების განყოფილების უფროსი, თინათინ ჩაკვეტაძე.

ის ამბობს, რომ გამოვლენილი 18 შემთხვევიდან 50%-ზე გაფრთხილება, ხოლო ამდენივეზე დაჯარიმების ოქმი დაიწერა.

სამმართველოში განმარტავენ, რომ საბურავებისა და რეზინის გაუვნებელყოფა უნდა მოხდეს დახურული წესით, რომელიც მუნიციპალური დასუფთავების სამსახურმა უნდა უზრუნველყოს.

თინათინ ჩაკვეტაძე ამბობს, რომ ასეთი ნარჩენს სპეციალური გადამუშავება ჭირდება, რის შესახებაც შეტყობინება თავად მოქალაქის მხრიდან უნდა მოხდეს.

ქალაქში დასუფთავებაზე პასუხიმგებელ შპს "სპეციალურ სერვისებში" განმარტავენ, რომ მათთვის, რეზინის ან საბურავის გატანის მოთხოვნით, არასოდეს მოუმართვთ.

"მაგრამ ყოფილა შემთხვევა, როდესაც სამშენებლო ნარჩენი გაგვიტანია. თუმცა, ეს არის ფასიანი მომსახურება, რადგან ჩვენ მოსახლეობას საყოფაცხოვრებო ნარჩენების გატანით ვემსახურებით", - განმარტავენ "სპეციალურ სერვისებში".

ცნება სახიფათო და არასახიფათო ნარჩენი, მას შემდეგ გაჩნდა, რაც 2014 წელს "ნარჩენების მართვის კოდექსი" დამტკიცდა.

მისი გარკვეული ნაწილი 2015 წელს ამოქმედდა. მათ შორისაა არასახიფათო ნარჩენების ღია წესით ან არადანიშნულების საწვავ დანადგარში დაწვა.

ამ დრომდე ნარჩენების საკითხი ადმინისტრაციული სამართალდარღვევათა კოდექსით განისაზვრებოდა. უშუალოდ "ნარჩენების მართვის კოდექსი" მას შემდეგ მიიღეს, რაც საქართველოს ევროპასთან ასოცირების ხელშეკრულებით, სხვა დანარჩენ ვალდებულებებთან ერთად, გარემოზე განსაკუთრებული ზრუნვა დაევალა.