აკაკი წერეთლის სახელმწიფო უნივერსიტეტის სტუდენტური საცხოვრებელი მობინადრეთა მოლოდინშია.

სასწავლებლის თვითმმართველობამ რეგიონში მცხოვრები 30–მდე სტუდენტის ფართებით დაკმაყოფილებისთვის განაცხადების მიღება 2 თვის წინ გამოაცხადა.

ამ დროისთვის უფასო საცხოვრებლით მხოლოდ 12 სტუდენტი დაინტერესდა. კონტინგენტის სრულად შევსებამდე კი, 10 000 ლარად ღირებული პროექტი, ვერ განხორციელდება.

უფასო საცხოვრებლით დაკმაყოფილებისთვის სტუდენტმა სამი მთავარი მოთხოვნა უნდა დააკმაყოფილოს. რეგიონში ცხოვრების გარდა, აუცილებელია მას სოციალურად დაუცველის სტატუსიც ჰქონდეს.

"გარდა ამისა, სტუდენტის საშუალო სემესტრული ქულა უნდა აღემატებოდეს 70-ს, რასაც 12 დაინტერესეული პირიდან, მხოლოდ რვა აკმაყოფილებს," – განმარტავს აკაკი წერეთლის სახელმწიფო უნივერსიტეტის თვითმმართველობის პრეზიდენტი, გიორგი ოკრიბელაშვილი.

უნივერსიტეტის თვითმმართველობაში განაცხადების დანაკლისს სტუდენტთა მხირდან ნაკლები ინტერესით ხსნიან.

"ინტერესი აღმოჩნდა მინიმალური," – ამბობს გიორგი ოკრიბელაშვილი.

ამ მიზეზის გამო, სტუდენტთა საცხოვრებლით დაკმაყოფილების პროექტი მეორე ფაზაში გადავიდა. თვითმმართველობამ დახმარებისთვის სასწავლებლის ფაკულტეტებს მიმართა.

"ფაკულეტეტების ხელმძღვანელებს ვთხოვეთ მოგვაწოდოს იმ სტუდენტთა მონაცემები, ვინც აკამყოფილებს მოთხოვნებს. ველოდებით, რომ ისინი დაგვეხმარებიან," – განაცხადა გიორგი ოკრიბელაშვილმა.

იმ შემთხვევაში, თუკი ფაკულტეტების ხელმძღვანელთა დახმარება შედეგს არ გამოიღებს, თვითმმართველობის პრეზიდენტის განმარტებით, პროექტის განხორციელება მომდევნო სემესტრისთვის გადაიდება.