ტყიბულში მდინარე ტყიბულა პოლიეთილენის ბოთლებითა და საყოფაცხოვრებო ნარჩენებითაა დაბინძურებული.

"გამვლელები ყრიან და ბოთლები კიდევ მდინარეს მოაქვს ზემოდან," - ამბობენ ადგილობრივები.

"გაფრთხილებული ვართ, რომ ნაგავი მდინარეში არ გადავყაროთ. თუ გადავყრით გამგეობა 500 ლარით დაგვაჯარიმებს, ამიტომ ვაგროვებთ და საღამოს ბუნკერში ვყრით," - ირწმუნება  ტყიბულში ერთ-ერთი მარკეტის თანამშრომელი, ინეზა ბოჭორიშვილი.



ადგილობრივების თქმით, მდინარის დანაგვიანებას სანაგვე ურნების არარსებობაც უწყობს ხელს. მათი თქმით, ნაგვის კონტეინერები მხოლოდ მდინარის ერთ მხარესაა განთავსებული. მეორე მხარეზე კი, ქუჩაში ურნები არ დგას, ხოლო კონტეინერი მიუგნებელ ადგილზეა.



ტყიბულის გამგეობაში განმარტავენ, რომ მდინარე ტყიბულას დასუფთავების აქცია რამდენიმე კვირის წინ მოეწყო, რომლის ფარგლებშიც მდინარე ნარჩენებისგან მთლანად გასუფთავდა.

"გარდა ამისა, კომუნალურმა სამსახურმა მიმდინარე წლის დასაწყისში ხე-მცენარეებისგან გაწმინდა მდინარე. პერიდულად, ეწყობა დასუფთავების აქციები, რომელშიც ჩვენი სამსახურების თანამშრომლები არიან ჩართული," - ამბობს ტყიბულის გამგეობის ეკონომიკისა და ქონების მართვის სამსახურის უფროსი, ალეკო ფანჩულიძე.

მისივე ინფორმაციით, მიმდინარე წელს გამგეობამ ორი ახალი ნაგავმზიდი და 100 კონტეირენი შეიძინა. მოსახლეობის პრეტენზიას იმის შესახებ, რომ ქუჩაში ურნები არ დგას იზიარებენ და ირწმუნებიან, რომ ეს პრობლემა მოგვარდება, მაგრამ ამავე დროს,  განმარტავენ, რომ  მალე საჯარიმო სანქციებიც ამოქმედდება.

"შევიძინეთ 18 ახალი ე.წ "ჭკვიანი ვიდეოკამერა", რომელიც მთელი მუნიციპალიტეტის მასშტაბით განთავსდება, მათ შორის ქალაქ ტყიბულშიც," - განმარტავენ გამგეობაში.

მათივე თქმით, კამერების განთავსების შემდეგ, გარემოს დაბინძურებისთვის, ფიზიკური და იურიდიული პირების მიმართ "ნარჩენების მართვის კოდექსით" დადგენილი საჯარიმო სანქციები ამოქმედდება.