გარემოს ეროვნული სააგენტოს ინფორმაციით, დასავლეთ საქართველოში ძლიერი წვიმა და ტემპერატურის მკვეთრი დაკლებაა მოსალოდნელი. სინოპტიკოსების ვარაუდით, 27 სექტემბრის დღის მეორე ნახევრიდან მოსალოდნელია ხანმოკლე წვიმა და ტემპერატურის 23-28 გრადუსამდე დაკლება. ხოლო, 28 სექტემბერს ძლიერი წვიმას პროგნოზირებენ.

"28 სექტემბერს იწვიმებს ძლიერად და ტემპერატურა 18 გრადუსამდე დაიკლებს, ასევე წვიმას უნდა ველოდოთ 29 სექტემბერსაც, ხოლო მაღალ მთაში კი, შესაძლოა, წამოთოვოს", - ამბობს გარემოს ეროვნული სააგენტოს მოკლევადიანი პროგნოზების დეპარტამენტის ხელმძღვანელი, დოდო გვაზავა.

გარემოს ეროვნული სააგენტოს ინფორმაციით, 29 სექტემბრის დღის მეორე ნახევრიდან გამოიდარებს. თუმცა, კვლავ დაბალი ტემპერატურა 19-24 გრადუსის ფარგლებში შენარჩუნდება. ამინდის გაუარესების გამო, გარემოს ეროვნული სააგენტო მოსახლეობას აფრილებს, რომ შესაძლოა მდინარეებზე წყლის დონემ მოიმატოს.