ქუთაისში, გაპონოვის ქუჩაზე რამდენიმე კვირაა წყალი იღვრება.

ადგილობრივთა თქმით, წყლის ნაკადი თითქმის უწყვეტ რეჟიმში მოედინება და ტბორავს ქუჩას.

გაპონოვის ქუჩის მცხოვრებლების განმარტებით, ქუჩაზე სამუშაოები "გაერთიანებული წყალმომარაგების კომპანიის" კონტრაქტორმა ფირმამ სმკ-მ ჩაატარა, რა დროსაც, მათი ვარაუდით, ძველი მილი დაზიანდა. კომპანიას კი პრობლემა ამ დრომდე არ აღმოუფხვრია. SMK--ს ქუჩაზე არც დაზიანებული გზის საფარი აღუდგენია.
"გაერთიანებული წყალმომარაგების კომპანიაში" ადასტურებენ, რომ გაპონოვის ქუჩაზე მილი SMK--მ დააზიანა.

"დარეკილი გვაქვს ამ საკითხზე უკვე ცენტრალურთან. კიდევ დავრეკავთ ახლა და გააკეთებენ. ეტყობა, ახალი მილების ჩაწყობის დროს ძველი მილი დაზიანდა", - ამბობენ კომპანიის ქუთაისის სერვისცენტრში.

SMK-წყლის სისტემის რეაბილიტაციას მთელი ქალაქის მასშტაბით ახორციელებს. "წყალმომარაგების კომპანიის" კონტრაქტორმა ფირმამ სამუშაოები 2018 წლის ივნისში უნდა დაასრულოს.

24 საათიანი წყალმომარაგებით კი ქუთაისი 2019 წელს იქნება უზრუნველყოფილი.