ქუთაისში გულმკერდის არეში დაჭრილი 9 წლის მოზარდის ჯანმრთელობის მდგომარეობა დამაკმაყოფილებელია.

როგორც დაზარალებულის მშობელი ამბობს, ბავშვი თავს უკვე კარგად გრძნობს და მალე ჩვეული ცხოვრების რეჟიმს დაუბრუნდება. 

"კრიზისი გადავიარეთ, უკვე ყველაფერი კარგადაა, თუმცა ორი დღე მაინც პალატაში ვრჩებით და ექიმების მეთვალყურეობის ქვეშ ვართ. მერე კი გაგვწერენ," - ამბობს მცირეწლოვანის მშობელი.

ქუთაისში 10 წლის მცირეწლოვანმა 9 წლის მოზარდი პნევმატური იარაღით გულმკერდის არეში დაჭრა. შემთხვევა 1 ივლისის მოხდა.

დაზარალებულის მშობლები "ქუთაისიპოსტთან" საუბარში ამბობენ, რომ ფაქტი შემთხვევით მოხდა, როდესაც ისინი ნათესავის ოჯახში სტუმრად იმყოფებოდნენ.

"უფროსები სახლში ვიყავით, პატარები კი გარეთ. ბავშვები ოჯახის უფროსის კუთვნილი პნევმატური იარაღით ერთობოდნენ თურმე და ამ ნათესავის ბავშვმა შემთხვევით ჩემი შვილი დაჭრა," - ამბობს დაზარალებული მცირეწლოვანის ოჯახის წევრი.

არასრულწლოვნებზე პნევმატური იარაღის ხელმისაწვდომობის ფაქტს, დაზარალებულის მშობელი დაუდევრობას უკავშირებს.

"ეზოში ყავთ ქათმები და ამ თოფით ოჯახის უფროსი კატებს აფრთხობდა თურმე. იგივეს გამეორება სცადა ბავშვმა, უნდოდა კატები დაეშინებია. ამ დროს კი ჩემმა შვილმა გაირბინა და ტყვია მოხვდა. რა თქმა უნდა, ეს არ იყო განზრახ გამიზნული ქმედება, მაგრამ ის რომ იარაღი ეზოში იყო დადებული დაუდევრობის ბრალია," - ამბობს დაზარალებული მცირეწლოვნის მშობელი.

მისი ინფორმაციით, პნევმატური იარაღით დაჭრილი მოზარდი შოკურ მდგომარეობაში ინტერვენციულ საავადმყოფოში გადაიყვანეს.

მოზარდს კარდიოქირურგიული ოპერაცია ჩაუტარდა, რადგან პაციენტს გულის და მარჯვენა ფილტვის ქსოვილების სისხლმდენი დაზიანებები აღმოაჩნდა. დარღვეული იყო გულის მკვებავი სისხლძარღვის მთლიანობა.

საქართველოს შინაგან საქმეთა სამინისტროს ინფორმაციით, ფაქტზე გამოძიება 118-ე მუხლით მიმდინარეობს, რაც ჯანმრთელობის განზრახ, ნაკლებად მძიმე დაზიანებას გულისხმობს.

ამავე თემაზე:

ქუთაისში გულმკერდის არეში დაჭრილი 9 წლის მოზარდის სიცოცხლეს საფრთხე არ ემუქრება