იმერეთში სამუშაოს მაძიებლებს დისტანციურად დასაქმების შესაძლებლობა ექნებათ.
საუბარია პროექტზე, რომელიც უმუშევრად დარჩენილ, თუ სამსახურის დაწყების მსურველებს, ადგილობრივ და მსოფლიო ბაზარზე დასაქმების შანსს მისცემთ.
დისტანციურად დასაქმებულებს "ფრილანსერებსაც" უწოდებენ. ეს დასაქმების ის ფორმაა, როდესაც მსხვილი, თუ მცირე კომპანიები  მათთვის სასურველ კადრს, შტატში აყვანის გარეშე, დისტანციურად სთავაზობენ სამსახურს. დაქირავებული კი, სამუშაოს სახლიდან გაუსვლელად, კომპიუტერის მეშვეობით ახორციელებს. ონლაინ ხდება შესრულებული სამუშაოს ანაზღაურებაც. ფრილანსერს, დამქირავებელი იქედან გამომდინარე ირჩევს, თუ რა სახის სამუშაოს შესრულება სურს.

დასაქმების ახალი პლატფორმა საქართველოს ეკონომიკისა და მდგრადი განვითარების სამინისტროს, ბიზნესისა და ტექნოლოგიების და დეპუტატის ირაკლი მეზურნიშვილის ინიციატივით ხორციელდება.

პროექტის ავტორი "ქუთაისიპისტთან" საუბარში განმარტავს, რომ  დასაქმების ამ სფეროში არსებობს კონკრეტული მიმართულებები,
რომლებიც უფრო მოთხოვნადია.

"ეს არის ციფრული დიზაინერი, გრაფიკოსი, პროგრამისტი, რომელსაც კომპანია ან კერძო პირი ხვადასხვა ამოცანის შესრულებისთვის ქირაობს. ანუ ადამიანს, რომელიც შეიძლება იყოს საზგღვარგარეთ, საქართველოდან დაიქირავოს კონკრეტული სამუშაოსთვის შემსრულებელი, ან პირიქით ადგილობრივ ბაზარზე დასაქმდეს," - ამბობს  ირაკლი მეზურნიშვილი.

დისტანციურად დასაქმების შექმნის მიზნით აქართველოს რეგიონებში ციფრული გადამზადების ცენტრები გაიხსნება, სადაც ბენეფიციარები ცოდნას მიიღებენ და დასაქმდებიან.

პროექტი იმერეთის მასშტაბით, პირველად წყალტუბოში დაიწყება და შემდეგ დანარჩენ მუნიციპალიტეტებსაც მოიცავს.

წყალტუბოში "ციფრული გადამზადების ცენტრის" დაფუძნების ინიციატორი მაჟორიტარი დეპუტატი, ცოტნე ზურაბიანია. როგორც ის ამბობს, რომ საგანმანათლებლო ცენტრი მუნიციპალიტეტში არსებულ ყოფილი ბიბლიოთეკის შენობაში მოეწყობა, რისთვისაც ობიექტის სარეაბილიტაციო სამუშაოები უკვე დაწყებულია.

"გლობალურ დასაქმების ბაზრებზე წვდომის მიზნით, მსურველი ბენეფიციარები ცენტრებში ეტაპობრივად გადამზადდებიან. პროექტის მიზანია რეგიონებში მოსახლეობისთვის ხელმისაწვდომი გახდეს ის ცოდნა, რომლითაც ისინი დასაქმდებიან," - ამბობს ზურაბიანი. მისივე თქმით,"ციფრული მოქალაქე" წყალტუბოში მიმდინარე წლის ოქტომბრიდან ამუშავდება.

"იმედია სახელმწიფოს მიერ მხარდაჭერილი პროექტი იმედგაცრუებულს არ დაგვტოვებს," - ამბობს წყალტუბოში მცხოვრები თამუნა თევზაძე.

"ძალიან მიხარია, თუ შეიქმნება ისეთი სივრცე, სადაც ახალგაზრდებს გადამზადების და დასაქმების საშუალება მოგვეცემს," - ამბობს სტუდენტი ნათია მამფორია. მისივე თქმით, პროექტი წყალტუბოს მსგავსად, სავარაუდოდ, ქუთაისშიც განხორციელდება.

"ძალიან კარგი  პროექტია და ქუთაისი ამ პროექტით აუცილებლად დაინტერესდება," - ამბობს ქუთაისის მაჟორიტარი დეპუტატი, გენადი მარგველაშვილი. თუმცა,  კონკრეტული ხედვები და ვადები პროექტის ქუთაისში განხორციელების თაობაზე დეპუტატებს არა აქვთ გადაწყვეტილი. 

პროექტი სახელწოდებით  "ციფრული მოქალაქე" სახელმწიფო ბიუჯეტიდან დაფინანსდება, თუმცა კონკრეტულად რა მოცულობის თანხა დაიხარჯება, ამაზე დაზუსტებული ინფორმაცია ჯერჯერობით უცნობია.

მსოფლიო ბაზარზე ფრილანსერთა სამუშაო რესურსით არაერთი კომპანია სარგებლობს.

ამ მხრივ არსებული სტატისტიკა იმაზე მიუთითებს, რომ დისტანციური დასაქმების ფორმა ციფრული ტექნოლოგიების სამყაროში, თანდათან უფრო პოპულარული ხდება.