ქუთაისის მერია ილია ჭავჭავაძის გამზირსა და ნიკეას ქუჩის გადაკვეთაზე მდებარე მიწისქვეშა გადასასვლელზე აუქციონს აცხადებს.
აუქციონში გამარჯვებულს, მერია ობიექტს, რომლის საერთო ფართი 659 კვ.მ-ია, 10 წლიანი ვადით, იჯარის ფორმით გადასცემს.

აუქციონის პირობების თანახმად, გამარჯვებულმა, ხელშეკრულების გაფორმებიდან 6 თვის ვადაში უნდა მოაწესრიგოს გადასასვლელი, მოაწყოს განათება და მუდმივად განახორციელოს დასუფთავების სამუშაოები.

აუქციონის გამარჯვებულს ასევე, უფლება აქვს ქონება კერძო საქმიანობის განხორციელების მიზნით გამოიყენოს.

საჯარო რეესტრის მონაცემებით, მიწისქვეშა გადასასვლელზე იჯარის უფლება პირველად 2010 წლის 2 ივნისს, აკაკი კუხალაშვილზე გაიცა.

ობიექტს სხვადასხვა წლებში რამდენიმე ქვემოიჯარეც ჰყავდა.

მოგვიანებით, 2013 წლის 21 თებერვალს, ქუთაისის მერიასა და გიორგი კეპულაძეს შორის 10 წლიანი საიჯარო ხელშეკრულება გაფორმდა, რომლის მიხედვითაც, მოიჯარეს ყოველწლიურად 2500 ლარის გადახდა დაეკისრა, თუმცა, ქუთაისის მერიის ინფორმაცით, გიორგი კეპულაძე ამ თანხას არ იხდიდა.

გიორგი კეპულაძე არც საიჯარო ხელშეკრულებით გათვალისწინებულ ვალდებულებებს ასრულებდა. კერძოდ, მას არ აღუდგენია მიწისქვეშა გადასასვლელის ფუნქციონირება, არ კეთილმოუწყვია ტერიტორია და ადგილზე არც სანიტარული ნორმების დაცვას უზრუნველყოფდა.

ამის შემდეგ, ადგილობრივმა თვითმმართველობამ კეპულაძეს აღებული ვალდებულებებისა და ადგილობრივი ბიუჯეტის წინაშე არსებული დავალიანების შესახებ რამდნეჯერმე აცნობა, თუმცა, მოიჯარემ არც ქირით გათვალისწინებული თანხა გადაიხადა და არც ხელშეკრულების სხვა პირობები შეასრულა.

ამის შემდეგ, ქუთაისის მერიამ 2016 წლის 25 ივლისს მასთან ხელშეკრულება შეწყვიტა.

ახალი მფლობელის გამოსავლენად, ქუთაისის მერიამ აუქციონი მიმდინარე წლის 14 ივნისს გამოაცხადა, რომელიც 29 ივნისს დასრულდება.



ამავე თემაზე:

ანტისანიტარია ქუთაისის მიწისქვეშა გადასასვლელებში (ვიდეო)