მოსწავლეთა მოტივაციის ამაღლების მიზნით, ქუთაისის სკოლების წარჩინებული კურსდამთავრებულები ოქროს მედლებით დაჯილდოვდნენ.

ის საქართველოს განათლებისა და მეცნიერების სამინისტროს პროექტ "წარჩინებულ მოსწავლეთა მედლების ქვე პროგრამა" ფარგლებში განხორციელდა, რომლის მიზანია მოსწავლეთა აკადემიური მოსწრების წახალისება და წარჩინებულ მოსწავლეთა წარმოჩენა.

წელს ოქროს მედლები გადაეცემა საჯარო და კერძო სკოლების 1861 კურსდამთავრებულს, რომელთაც სკოლა 2015-2016 სასწავლო წელს დაასრულეს. მათ შორის, 132 ქუთაისის წარმომადგენელია. ქუთაისის წარჩინებული კურსდამთავრებულები ოქროს მედლებით განათლებისა და მეცნიერების მინისტრის მოადგილემ ლია გიგაურმა, განათლებისა და მეცნიერების კომიტეტის თავმჯდომარემ მარიამ ჯაშმა, ქუთაისის ვიცე-მერმა ნოდარ მიქიაშვილმა და იმერეთის ვიცე-გუბერნატორმა პაატა ნადირაძემ დააჯილდოვეს.

მედალოსან კანდიდატთა შერჩევის კრიტერიუმები ეროვნული სასწავლო გეგმით რეგულირდება. მოსწავლე, რომლის საშუალო საფეხურის საერთო ქულაა 10 დამრგვალების გარეშე და მიიღებს დადებით შეფასებას სკოლის გამოსაშვებ გამოცდებზე, იღებს სრული ზოგადი განათლების ოქროს მედალოსნის ატესტატს. მოსწავლე, რომლის საშუალო საფეხურის საერთო ქულა არის 9.8 ან მეტი და მიიღებს დადებით შეფასებას სკოლის გამოსაშვებ გამოცდებზე, იღებს სრული ზოგადი განათლების ვერცხლის მედალოსნის ატესტატს.