მიმდინარე წლის გაზაფხულზე საქართველოს შეიარაღებულ ძალებში ქუთაისიდან გასაწვევ პირთა მაქსიმალური რაოდენობა 106-ს შეადგენს, იმერეთის რეგიონიდან კი - 457.

ამ მონაცემებს მობილიზაციისა და სამხედრო სამსახურში გაწვევის კოორდინირების დეპარტამენტი გვაწვდის, რომელიც რეგიონული განვითარებისა და ინფრასტრუქტურის სამინისტროს დაქვემდებარებაშია.

საქართველოს მთავრობის 2017 წლის 3 თებერვლის #57-ე დადგენილებით, საგაზაფხულო გაწვევა 1 თებერვალს დაიწყო და 30 ივნისამდე გაგრძელდება.

მობილიზაციისა და სამხედრო სამსახურში გაწვევის კოორდინირების დეპარტამენტის ინფორმაციით, გაწვეული პირების რაოდენობა გეგმას გადააჭარბებს.

ამ დროისთვის არსებული მონაცემებით, ქუთაისში სამხედრო აღრიცხვაზე 93 პირი იმყოფება, მთლიანად იმერეთის რეგიონის მასშტაბით კი 493 პირი.

გასულ წელს საგაზაფხულო და საშემოდგომო გაწვევის სტატისტიკა ნახეთ ქუთაისიპოსტის მიერ მომზადებულ ინფოგრაფიკაში:


ქუთაისში, სამხედრო აღრიცხვას დაქვემდებარებული 18-დან 25 წლამდე პირები, შეტყობინებას მერიის სამხედრო სამსახურიდან იღებენ. აღრიცხვის შემდეგ ისინი ადგილობრივ გამწვევ კომისიაზე შემოწმებას გადიან.

სამხედრო სამსახურის უფროსის, ვალერი ყენიას ინფორმაციით, მთავრობის დადგენილებით განსაზღრული გეგმა ბოლო წლებში გადაჭარბებით სრულდება, რადგან სამხედრო სამსახურის გავლის მსურველთა რაოდენობა იმატებს.

"ბევრი ისეთი ახალგაზრდა მოდის, ვინც სამხედრო სამსახურს არ ექვემდებარება, მაგალითად დედისერთები ან სტუდენტები, მაგრამ მიუხედავად ამისა, მათ მაინც სურთ ჯარში იმსახურონ," - ამბობს ვალერი ყენია.

მიმდინარე წლის 1 ივნისს საქართველოს პარლამენტმა პირველი მოსმენით კანონპროექტი მიიღო, რომელიც წვევამდელს სამხედრო სამსახურისთვის თავის არიდებისთვის სისხლის სამართლის პასუხისმეგბლობას აკისრებს.

კერძოდ, სისხლის სამართლის კოდექსის 356-ე მუხლში დაზუსტდა ის მიზეზები, რის გამოც წვევამდელებს ჯარიმა ან 3 წლამდე თავისუფლების აღკვეთა დაეკისრებათ.


ამავე თემაზე:

სასჯელი ჯარში სამსახურის თავის არიდებისთვის - რა დაეკისრებათ წვევამდელებს