არასამთავრობო ორგანიზაცია "ევროპა ჩვენი სახლიას" თავმჯდომარის, გია გოქაძის განცხადებით, მოსკოვის ყოფილი მერი იური ლუშკოვი საქართველოში კანონის დარღვევით იმყოფება და ის დაუყონებლივ უნდა დააპატიმრონ.

გია გოქაძე მოსკოვის ყოფილი მერის დაკავებას 2009 წელს მომხდარი ფაქტის გამო ითხოვს. ის ამბობს, რომ 2009 წელს იური ლუშკოვი რუსეთის მიერ საქართველოს ოკუპირებულ ტერიტორიაზე უკანონოდ იმყოფებოდა.

"2009 წელს იური ლუშკოვი იმყოფებოდა სოხუმის და ცხინვალის ტერიტორიაზე. თუმცა, ის საქართველოს საზღვრიდან იქ არ შესულა, გამოდის მან საქართველოს ოკუპირებული ტერიტორიების შესახებ 2008 წელს მიღებული კანონის ერთ-ერთი მუხლი დაარღვია, რომლის მიხედვითაც უცხო ქვეყნის მოქალაქეებისთვის და მოქალაქეობის არმქონე პირებისთვის ოკუპირებულ ტერიტორიებზე შესვლა დაშვებულია აფხაზეთის ავტონომიური რესპუბლიკის ტერიოტრიაზე ზუგდიდის მუნიციპალიტეტის მიმართულებით, ხოლო ცხინვალის რეგიონში გორის მუნიციპალიტეტის მიმართულებით.

მოსკოვის ყოფილმა მერმა დაარღვია ეს კანონი და გამოდის, რომ საქართველოს ხელისუფლება არ იცავს კანონს. მოვითხოვთ, სასწრაფო წესით იქნას აღკვეთილი იური ლუშკოვის ვოიაჟი საქართველოში და მის მიმართ განხორციელდეს სისხლის სამართლებრივი დევნა", - განაცხადა  ბრიფინგზე არასამთავრობო ორგანიზაცია "ევროპა ჩვენი სახლია" თავმჯდომარემ, გია გოქაძემ.

მისი თქმით, იური ლუშკოვის საქართველოში ყოფნის შესახებ მან სოციალური ქსელის მეშვეობით გაიგო.

იური ლუშკოვი მოსკოვის მერის თანამდებობას 2010 წლამდე იკავებდა.