ქუთაისის ადგილობრივი თვითმმართველობის წარმომადგენლებისგან დანაპირების შესრულება სკეიტერებმა საპროტესო აქციით მოითხოვეს. ქუთაისში არსებული სკეიტერთა ჯგუფი, მერიისგან სასრიალო მოედნის  მოწყობას და ორმაისობის დღესასწაულის ღონისძიებებში ჩართვას ითხოვენ. 

აქციის მონაწილეების  თქმით,  მერია მათ მოედნის მოწყობასა და ორ მაისობის დღესასწაულზე ჩასმას დაპირდა. ახლა კი განუმარტეს, რომ  მოედნის მოსაწყობად საკმარისო თანხა არ აქვთ. 

"გვჭირდება სასრიალო მოედანი, რომელსაც დაგვპირდნენ, მაგრამ ფული როგორც აღმოჩნდა, ახლა არ არის", -  ამბობს  აქციის მონაწილე, სკეიტერი ნინი ხელაძე.

სკეიტერები ხუთი წელია, მოედნის არ არსებობის გამო, საავტომობილო და ხალხის სავალ ტროუარებზე ვარჯიშობენ. რაც, მათი თქმით, საზოგადოების უკმაყოფილებას ხშირად იწვევს და ასევე, უსაფრთხოც არ არის.
სკეიტერებმა აქციაზე პერფომანსიც მოაწყვეს. 



ქუთაისის 2016 წლის ადგილობრივ ბიუჯეტში, სპორტის განვითარების ხელშეწყობის პროგრამაში "სკეიტბორდით" სრიალისთვის შესაბამისი მოედნის მოსაწყობად 50 ათასი ლარი იყო განსაზღვრული. პროექტი ქუთაისის მერიის საბინაო ინფრასტრუქტურის მართვისა და განვითარების სამსახურს უნდა განეხორციელებინა.

ქუთაისის მერიაში აცხადებენ, რომ მოკვლევის შედეგად დადგინდა, რომ 80 ათასი ლარი დასჭირდებოდა მოედნის მოწყობას, ამიტომ პარკის მოწყობის ვადაც ჯერჯერობით დაუდგენელია. თუმცა, ირწმუნებიან რომ მოედანი აუცილებლად მოეწყობა.

რაც შეეხება ორ მაისობის ღონისძიებაში მონაწილეობის საკითხს, მერიაში განმარტავენ, რომ ის 7 ათასი ლარი დაჯდა, რომლის დაფინანსების რესურსი მათივე თქმით, არ აქვთ.