ქუთაისის საკრებულოს თავმჯდომარის მეორე მოადგილე, ნიკოლოზ ლატარია, არასამთავრობო ორგანიზაცია "საერთაშორისო გამჭვირვალობა საქართველოს"  13 მარტს გამოქვეყნებულ კვლევას ეხმაურება, რომელიც 2016 წელს გაცემულ პრემიებსა და სახელფასო  დანამატებს შეეხება. ნიკოლოზ ლატარიაც, კოლეგის ბექა ყანჩელის მსგავსად აცხადებს, რომ სახელფასო დანამატს ქველმოქმედებაში ხარჯავენ.   

"ვხარჯავ ანუ ვურიცხავ საქველმოქმედო ორგანიზაციებს და განსაცდელში მყოფ ჩვენს მოქალაქეებს. შემიძლია ამის დამადასტურებელი საბუთები წარმოვადგინო. რაც შეეხება, ჩემს ხელფასს მას მთლიანად ჩვენს კოლეგას ვაძლევ რადგან მასაც ბევრი პრობლემები და განსაცდელი აქვს აღარ დავკონკრეტდდები ისედაც იცის ეს ამბავი ბევრმა. კიდევ ამის ზემოთ რამდენ ლარსაც ქველმოქმედების სახით ვცემდე,  იმდენი სიკეთე ჩემს ოჯახს", - აცხადებს საკრებულოს თავმჯდომარის მოადგილე, ნიკოლოზ  ლატარია. 

ის ასევე ამბობს, რომ ადგილობრივი თვითმმართველობის არჩევნებში მონაწილეობას არ  გეგმავს.

"ეხლა არჩევნები ახლოვდება და შეუკვეთეს ეს ამბები ჩვენს წინააღმდეგ. მივმართავ დამკვეთებს,  რომ მშვიდად იყოთ,  რადგან მე მეტჯერ არჩევნებში მონაწილეობას არ ვაპირებ და საერთოდ მივდივარ მალე პოლიტიკიდან. არაა ეგ ჩემი საქმე. ასე რომ ტყუილად ირჯებით", - აცხადებს ის. 

არასამთავრობო ორგანიზაცია "საერთაშორისო გამჭვირვალობა–საქართველოს" მიერ 2016 წელს იმერეთის 12 მუნიციპალიტეტში ჩატარებული კვლევის მიხედვით, ყველაზე მეტი რაოდენობით პრემია და დანამატი ქუთაისის მერიასა და საკრებულოში გაიცა.