ქუთაისის მჟორიტარმა დეპუტატებმა მოქალაქეების მიღება არჩევნების დასრულებიდან ორი თვის შემდეგ დაიწყეს. საუბარია, ქუთაისის  #47–ე ოლქის მაჟორიტარზე, გენადი მარგველაშვილზე და #48-ე ოლქის დეპუტატ, დიმიტრი მხეიძეზე, რომლებიც ამომრჩევლებს საკუთარ ბიუროში იღებენ.


რაც შეეხება, მესამე დეპუტატს, კობა ნარჩემაშვილს,  იმის გამო, რომ მისი ბიუროსთვის განკუთვნილი  ფართი  ამ დრომდე გათავისუფლებული არ არის, მოქალაქეებს ბიუროში ვერ იღებს.

გენადი მარგველაშვილის ბიუროში, რომელიც მიმდინარე წლის 19 იანვრიდან შეუდგა მუშაობას, ამბობენ, რომ უკვე 50–მდე მოქალაქე მიიღეს. თავად, დეპუტატმა ამომრჩევლებთან შეხვედრა კი მხოლოდ ერთხელ მოახერხა.

"არსასესიო კვირის ოთხშაბათი დღე შევარჩიეთ შეხვედრისთვის, ანუ ორ კვირაში ერთხელ. მიმდინარე კვირის ოთხშაბათს უწევს მეორე შეხვედრა ბატონ გენადის მოქალაქეებთან", – ამბობს გენადი მარგველაშვილის ბიუროს ხელმძღვანელი, ზაზა ჯანგველაძე.

მარგველაშვილის ბიუროში, რომელიც  მერიის გვერდით მდებარე შენობის მესამე სართულზეა განთავსებული, 6 ადამიანია დასაქმებული.

მხოლოდ 2 თანამშრომელი ჰყავს ბიუროში დიმიტრი მხეიძეს, რომელსაც ოთახი მერიის ადმინისტრაციული შენობის მესამე სართულზე, წინა მოწვევის პარალემენტში, ქუთაისის მაჟორიტარი დეპუტატის, გუბაზ სანიკიძისთვის განკუთვნილ ოთახში აქვს. დიმტრი მხეიძემაც მოქალაქეების მიღება  იანვარში დაიწყო.  

მხეიძის ბიუროში ამბობენ, რომ დეპუტატმა 15-მდე შეხვედრა უკვე გამართა მოქალაქეებთან.

"თუ გადადუდებელი შემთხვევაა, დაგეგმვის გარეშეც მოდის. წერილებსაც ტოვებენ მოქალაქეები, მაგრამ უფრო ხშირად პირადად ითხოვენ შეხვედრას", –ამბობს დიმიტრი მხეიძის ბიუროს ხელმძღვანელი, ვარლამ გობეჯიშვილი.

ქუთაისს, მეცხრე მოწვევის პარლამენტში სამი მაჟორიტარი დეპუტატი ჰყავს.