ქუთაისში ტიხრული მინანქრის შემსწავლელმა სკოლამ დაიწყო ფუნქციონირება.
აღნიშნული სკოლა კომპანია "ლეგენდა"-ს და ქუთაისის ისტორიული მუზეუმის ერთობლივი პროექტის საფუძველზე დაარსდა. სასწავლო კურსებიც, სწორედ მუზეუმის შენობაში ჩატარდება. 


კომპანია "ლეგენდას" სათაო ოფისი თბილისშია. ამიტომ ქუთაისში თბილისელი სპეციალისტები ამ ეტაპზე მინანქარზე მუშაობის დაჩქარებული მეთოდით სწავლებას გეგმავენ, რომელიც ორთვიანი სწავლების კურსს მოიცავს.

როგორც სკოლის წარმომადგენლები აცხადებენ, პირველ ეტაპზე  4-5 მოსწავლის აყვანა იგეგმება. მათივე თქმით, ამ მოსწავლეებიდან საუკეთესოს დამატებითი ტრენინგი ჩაუტარდება, რომელიც შემდეგ მასწავლებლის ფუნქციას შეითავსებს.

კომპანია „ლეგენდას“ ხელმძღვანელი, მამუკა ჭოხონელიძე ამბობს, რომ ტიხრული მინანქრის სრული ტექნოლოგიური პროცესის შესწავლაა დაგეგმილი. 
ჩატარდება 16 გაკვეთილი, რომლის ხანგრძლივობა 3 -3 საათს გაგრძელდება.

"ტიხრული მინანქრის ძველი დაკარგული ხელოვნების აღდგენა მოხდა, რაც ძალიან მოთხოვნადი გახდა. სხვა ნაკეთობებთან ერთად ვამზადებთ არქეოლოგიური გათხრების დროს ნაპოვნი სამკაულების ასლებსაც", - ამბობს მამუკა ჭოხონელიძე.

ძველი ქართული ტრადიციის აღდგენა-შესწავლაზე მიუთითებს ქუთაისის ისტორიული მუზეუმის დირექტორი ომარ ლანჩავაც.

„სკოლაში მოხდება მინანქრის დამზადების მეთოდოლოგიის შესწავლა, გარკვეული ტრადიციის საფუძველზე, რომელსაც დიდი ხნის ისტორია აქვს“, - აღნიშნა ომარ ლანჩავამ

მინანქრის შემსწავლელ სკოლაში სწავლა 28 თებერვალს დაიწყება.

სწავლების ღირებულება 800 ლარს შეადგენს.

კომპანია "ლეგენდა" თბილისში 14 წელია ფუნქციონირებს.