ქუთაისის საქალაქო სასამართლომ, სასულიერო პირს, გიორგი ჯახუას, რომლის სახლიდანაც სამართალდამცავებმა ორი ძირი მარიხუანა ამოიღეს, გირაოს სახით 2000 ლარის გადახდა დააკისრა.
ჯახუას ადვოკატის, ვალერი თევდორაძის თქმით, პროკურატურა თავდაპირველად აღკვეთის ღონისძიების სახით 3000 ლარიან გირაოს ითხოვდა, თუმცა, სასამართლომ მოთხოვნა ნაწილობრივ დააკმაყოფილა.

თავად გიორგი ჯახუა  ქუთაისიპოსტთან საუბარში ამბობს, რომ გადაწყვეტილებას არ ეთანხმება და არც თანხის გადახდის შესაძლებლობა აქვს.

"სასამართლომ მიიღო უკანონო გადაწყვეტილება. მე არ მაქვს ამ თანხის გადახდის შესაძლებლობა. ეს არის უსამართლობა,– ამბობს ჯახუა.

გიორგი ჯახუას ადვოკატის, ვალერი თევდორაძის თქმით, თანხის გადაუხდელობის შემთხვევაში სასულიეო პირის დაკავება გამორიცხული არ არის.

"მისი ფინანსური მდგომარეობა იძლევა საფუძვლიან  ეჭვს იმის შესახებ, რომ მას არ შეუძლია გირაოთი გათვალისწინებული თანხის გადახდა. ასეთ შემთხვევაში კი გამორიცხული არ არის მისი დაკავება მოხდეს",–აცხადებს ვალერი თევდორაძე.

ჯახუას თანხის გადასახდელად 30 დღიანი ვადა აქვს. 

გიორგი ჯახუას სახლიდან ორი ძირი კანაფი სამართალდამცავებმა მიმდინარე წლის 19 იანვარს ამოიღეს.

სასულიერო პირი აცხადებს, რომ იგი კანაფს მკურნალობის მზინით იყენებს.

ჯახუას წინააღმდეგ სისხლის სამართლის საქმე 265 მუხლის მე- 3 ნაწილით აღიძრა, რაც 6 დან 12 წლამდე პატიმრობას ითვალისწინებს.