აკაკი წერეთლის სახელმწიფო უნივერსიტეტის სტუდენტებს ფილოსოფიის ინსტიტუტის წარმომადგენლებმა თავინთი ნაშრომები გააცნეს.

"ჰუსერლის ფენომენოლოგია", "ცნობიერების ფილოსოფია", "ფილოსოფია და თეოლოგია შუა საუკენეებში" და ა.შ – ეს ის ნაშრომებია, რომლებიც ამ დრომდე ქართულ ენაზე არ არსებობდა. წიგნები შეხვედრის ორგანიზატორების, სავლე წერეთლის სახელობის ფილოსოფიის ინსტიტუტის თანამშრომელთა მიერ ითარგმნა.

მათი თქმით, ნაშრომები უკვე სასწავლო პროცესის ნაწილია, რაც სტუდენტების განათლებას მეტად უწყობს ხელს.

"გამოცემული წიგნების უმეტესობასთან მანამდე სტუდენტებს შეხება არ ჰქონიათ, რადგან არ იყო ნათარგმნი. ჩვენ კი გვინდა, რომ მეტი ინფორმაცია მივაწოდოდოთ სტუდენტებს და მივცეთ შანსი გაეცნონ ახალ ფილოსფიურ ნაშრომებს," - განაცხადა სავლე წერეთლის ფილოსოფიის ინსტიტუტის დირექტორის თანაშემწემ, ვახტანგ ქარელმა.

მისივე ინფორმაციით, ინსტიტუტში 2011 წლიდან ამ დრომდე 9 ფილოსოფიური ნაშრომი ითარგმნა.

პრეზენტაციის ორგანიზატორების თქმით, მსგავსი შეხვედრები ქვეყნის სხვა რეგიონებშიც იგეგმება.

საქართველოში ფილოსოფიის ინსტიტუტი 1946 წლიდან არსებობს. 2011 წლიდან კი ილიას სახელმწიფო უნივერსიტეტს შეუერთდა და ფილოსოფოს სავლე წერეთლის სახელი მიენიჭა.

მიმდინარე წელს ინსტიტუტის დაარსებიდან 70 წელი შესრულდა.