ქუთაისში მოკლემეტრაჟიანი ახალგაზრდული ფილმების ფესტივალი გადაიდო.

მისი გამართვა შემოდგომაზე იგეგმებოდა. მასში მონაწილეობას ის ქართველი და უცხოელი რეჟისორები მიიღებდნენ, რომლებმაც გასულ წელს თბილისის საერთაშორისო კინოფესტივალზე თავიანთი პროდუქცია წარმოადგინეს.

"ახალგაზრდული ღონისძიებების 2016 წლის ბიუჯეტში იყო გათვალსიწინებული ფესტივალი. თუმცა, რადგანაც ე.წ კინოთეატრის "საქართველო" გახსნა გადაიდო რამდენიმე ხნით, ამიტომ ცვლილებები შევიდა დაგეგმილ ღონისძიებებშიც", - აღნიშნა ქუთაისის მერიის ახალგაზრდულ საქმეთა განყოფილების უფროსმა, თამარ ნიკოლეიშვილმა.

კინოთეატრის "საქართველო" ადმინისტრაციაში კი ზუსტ თარიღს ვერ აკონკრეტებენ, თუმცა ირწმუნებიან, რომ კინოდარბაზები წლის ბოლომდე გაისხნება.

"ზუსტად ვერ გეტყვით, მაგრამ სავარაუდოდ, წლის ბოლომდე იქნება," - განმარტავენ კინოთეატრის ადმინისტრაციაში.

როგორც ქუთაისის მერიაში განმარტავენ, ფესტივალს სხვა პროექტი "ზაფხულის კინოსკოლა" ჩაენაცვლა, სადაც ადგილობრივი ახალგაზრდები იყვნენ ჩართული. კინოსკოლის ფარგლებში ორი ფილმი გადაიღეს.

მერიის ახალგაზრდულ საქმეთა განყოფილებაში იმედს გამოთქვამენ, რომ 2017 წლის ბიუჯეტში გათვალისწინებული იქნება ახალგაზრდული კინოფესტივალის გამართვისთვის თანხები, ოღონდ უფრო მასშტაბური სახით, როგორც ქართველი, ისე უცხოელი ახალგაზრდა ავტორების მონაწილეობით.

"ჩვენი სურვილია ფესტივალში ჩაერთონ ის ქართველი ახალგაზრდა კინორეჟისორებიც, რომლებმაც ამ კინო სკოლაში გაიარეს გაკვეთილები", - აღნიშნა თამარ ნიკოლეიშვილმა.

მისივე თქმით, ფესტივალზე მოწვეული იქნებიან პროფესიონალებიც, რომლებიც დამწყები რეჟისორებისთვის მასტერკლასებს ჩაატარებენ.

მოკლემეტრაჟიანი ახალგაზრდული ფილმების ფესტივალისთვის ქალაქის ბიუჯეტიდან 4 ათასი ლარი იყო გამოყოფილი.