არასამთავრობო ორგანიზაციის "საზოგადოებრივი ინტერესების დაცვის ცენტრის" ხელმძღვანელზე განხორციელებულ ფიზიკური ძალადობის ფაქტზე გამოძიება არ დასრულებულა. 
შემთხვევა გასული წლის ოქტომბერში მოხდა.

მას შინაგან საქმეთა სამინისტრო იძიებს. უწყების საზოგადოებასთან ურთიერთობის სამსახურის წარმომადგენლის, ტატო კუჭავას განმარტებით, საქმე სისხლის სამართლის კოდექსის 125-ე მუხლით არის აღძრული.

მისივე განმარტებით, საქმესთან დაკავშირებით რამდენიმე პირი დაიკითხა. თუმცა, კონკრეტულად ვინ, ამას არ აკონრეტებენ.

სულხან ქობულაძის განცხადებით, ის ქუთაისის საკრებულოს თავმჯდომარემ, დავით დვალმა ცემა. დაზარალებული, გამოძიების გაჭიანურების მიუხედავად, დათმობას არ აპირებს.

"ჯერჯერობით, მიმდინარეობს გამოძიება - ამ პასუხით იგერიებენ ჩემს შემოტევას. თავის დროზე, ამ ამბავზე კურირება აიღო ქალაქის მერმა, შოთა მურღულიამ, რომელმაც  ირაკლი ღარიბაშვილი ნათესავების მეშვეობით მფარველობა გაუკეთა დვალს. თორემ, პრაქტიკულად, ამ ამბიდან ორ-სამ დღეში, გადადგომასაც აპირებდა და ბოდიშის მოხდასაც. იმჟამინდელ პრემიერ მინისტრს, ირაკლი ღარიბაშვილს უშიშროებამაც მისწერა, იმხელა სკანდალი ატყდა ამ ამბავზე. ეგონათ, გამაჩუმებდნენ ან მიყიდიდნენ, მაგრამ რომ არ გამოუვიდათ, საქმე თაროზე შემოდეს. ასეთი გამოსავალი ნახეს," - ამბობს სულხან ქობულაძე.

ის ამ საკითხის დასმას ახლადარჩეულ პარლამენტში გეგმავს.

სულხან ქობულაძის ინფორმაციით, 2015 წლის ოქტომბერში, მას ფიზიკური შეურაცხყოფა საკრებულოს თავმჯდომარემ, დავით დვალმა, მისმა მოადგილემ, ბექა ყანჩელმა, დვალის მძღოლმა და უცნობმა ადამიანმა მიაყენეს.

იმ დროისთვის ინცინდენტს თავად დავით დვალი არც უარყოფდა და არც ადასტურებდა. ის მხოლოდ განმარტავდა, რომ არ არის ისეთი ადამიანი, ვინმეს უსამართლოდ შეურაცხყოფა მიაყენოს ან დაჩაგროს. თუმცა, მომხდარი ფაქტიდან რამდენიმე დღის შემდეგ, მან საკრებულოს თავმჯდომარის უფლებამოსილება შეიჩერა.

"გამოძიების ინტერესებიდან და ჩემი მაღალი სტატუსიდან გამომდინარე, რომ არ დარჩეს ვინმეს განცადა იმისა, რომ ჩემი სტატუსი ბოროტად გამოვიყენო და ვცადო გამოძიების ინტერესებში ჩარევა, მივიღე გადაწყვეტილება და დროებით ვიჩერებ უფლებამოსილებას, სანამ გამოძიება არ დასრულდება," – განაცხადა დავით დვალმა.