ქუთაისში საკეისრო კვეთის შემდგომ ახალგაზრდა გოგონას გარდაცვალების მიზეზებზე ცხაკაიას სახელობის ინტერვენციული მედიცინის ცენტრში ამ დრომდე არ საუბრობენ.

მიუხედავად იმისა, რომ "ქუთაისიპოსტმა" შეასრულა კლინიკის მოთხოვნა, წარედგინა მათთვის ოჯახის წევრების წერილობითი თანხობა მიგვეღო დეტალური ინფორმაცია, დირექრტორმა ანჟელა ორჯონიკიძემ განაცხადა, რომ ორშაბათამდე გარდაცვალების მიზეზებზე ვერ ისაუბრებენ.

"ახლა სამუშაო საათები დასრულებულია, ხელწერილი უნდა გაატაროს იურისტმა და შემდგომ მოგცეთ განმარტება," - ამბობს ორჯონიკიძე.

ქუთაისში მცხოვრები 23 წლის ლანა მიქაბერიძე ინტერვენციული მედიცინის ცენტრში 26 ოქტომბერს გარდაიცვალა. პაცინეტი მედიცინის ცენტრში კლინიკა
"ბომონდიდან" 25 ოქრომბერს გადაიყვანეს, სადაც მას საკეისრო კვეთა ჩაუტარდა.

გარდაცვლილის ოჯახის წევრები კლინიკის ქირურგს ადანაშაულებენ.

"ზუსტად ვერ განგვიმარტეს, რატომ გართულდა ლანას მდგომარეობა. გვეუბნებოდნენ, რომ ხუთი წლის წინ ცუდად გაკეთებული საკეისრო კვეთის გამო შეიქმნა პრობლემა, თუმცა არსებობს კვლევები, სადაც სჩანს, რომ ლანა ჯანმრთელი იყო. ვეჭვობთ, "ბომონდში" ვეღარ შველოდნენ და ამიტომ გადაიყვანეს ინტერვენციულში, თუმცა ლანა უკვე უგონოდ იყო," - ამბობს გარდაცვლილის ბებია ქუთაისიპოსტთან საუბარში.

თავად ქირურგი გოგონას გარდაცვალებაში საკუთარ ბრალეულობას არ ადასტურებს.

"ჩვენ ყველანაირ ღონისძიებას მივმართეთ, სისხლდენა გავაჩერეთ, თუმცა პაციენტი საჭიროებდა ხელოვნურ სუნთქვით მართვას, ჩვენ არ გვაქვს ოფიციალურად რეანიმაციული განყოფილება, რის გამოც ის გადავივყანეთ ინტერვენციულში. პაციენტის მდგომარეობა მძიმე იყო, თუმცა მის გარდაცვალებას არ ველოდებოდით არანაირად," –ამბობს მამუკა მიქაძე.

23 წლის ლანა მიქაბერიძეს მეუღლე და ორი შვილი, 5 წლის ბიჭი და ახალშობილი გოგონა დარჩა.

ახალშობილი ამ დრომდე კლინიკა "ბომონდში" რჩება.

საქართველოს შინაგან საქმეთა სამინისტროს ინფორმაციით, ლანა მიქაბერიძეს გარდაცვალების ფაქტზე გამოძიება სისხლის სამართლის კოდექსის 116–ე მუხლითაა დაწყებული, რაც გაუფრთხილებლობით სიცოცლის მოსპობას გულისხმობს.

ამავე თემაზე:

ქუთაისში საკეისრო კვეთის შემდგომ ახალგაზრდა გოგონა დაიღუპა